O‘zbekiston futbol assosiasiyasi tomonidan mamlakatimizda faoliyat yuritayotgan hakamlarning malakasini oshirish, hakamlar tomonidan o‘yinlarni boshqarishda halollik va shaffoflikni ta’minlash maqsadida bir qator chora-tadbirlar amalga oshirilmoqda.
Jumladan, Coca Cola Superliga va PRO-liga tur uchrashuvlaridan so‘ng O‘FA Hakamlar va nazoratchilar departamenti tomonidan hakamlar uchun maxsus seminar tashkil qilinib, ortda qolgan tur o‘yinlarida ishlagan hakamlar faoliyati turli videolavhalar yordamida o‘rganib chiqiladi va yo‘l qo‘yilgan xato-kamchiliklar tahlil qilinadi.
Mazkur seminarga yurtimizda faoliyat olib borayotgan barcha turdagi ommaviy axborot vositalari vakillarini ham taklif etamiz.
OAV vakillari ertaga, 20 avgust kuni soat 10:00 da O‘FA Majlislar zaliga tashrif buyurib navbatdagi seminarning ishtirokchisiga aylanishi mumkin.
