Xabaringiz bor, so‘nggi ikki kunda Coca Cola O‘zbekiston Kubogining chorak final uchrashuvlari bo‘lib o‘tdi va yarim finalchilar aniqlandi.

Yarim finalga AGMK, «Bunyodkor», «Paxtakor» va «Nasaf» jamoalari yo‘l oldi. Xo‘sh, ko‘pchilikni qiziqtirayotgan O‘zbekiston Kubogining yarim final bahslariga qachon qur’a tashlanadi? Biz bunga oydinlik kiritish maqsadida O‘zPFL rasmiylari bilan bog‘landik.

Bizga ma’lum qilishlaricha, Coca Cola O‘zbekiston Kubogi va O‘zbekiston Liga Kubogining yarim final bahslariga bir vaqtda qur’a tashlanadi. Rejaga ko‘ra, mazkur qur’a tashlash marosimi avgust oyining so‘nggi yoki sentyabrning ilk kunlarida bo‘lib o‘tadi.

Eslatib o‘tamiz, O‘zPFL taqvimiga ko‘ra, Coca Cola O‘zbekiston Kubogining yarim final bahslari 26 sentyabrda bo‘lib o‘tishi rejalashtirilgan.