Italiya chempionatining 2-turida "Yuventus" va "Napoli" jamoalari «Alyans Stedium»da to‘qnash kelishdi va muxlislarga ajoyib o‘yin namoyish qilib berishdi.

Ishqibozlar bu uchrashuvda 7ta golga guvoh bo‘lishdi. O‘yin boshida olis masofadan yo‘llangan zarbani turinliklar posboni mahorat bilan qaytarishga muvaffaq bo‘ldi. Shundan so‘ng esa "Yuve"ning omadli lahzalari bilan boshlandi. Mezbonlar qarshi hujumda neapolliklarni jazolashdi: Duglas Kosta to‘pni raqib jarima maydonchasigacha olib borib, hujumda paydo bo‘lgan Daniloga uzatma berdi. Himoyachi hujumchilarga xos ravishda darvozani ishg‘ol qildi. Oradan ko‘p o‘tmasdan Iguain jarima maydonchasi qiroliga xos harakat qilib, himoyachini aldab o‘tdiyu darvozani zabt etdi. Tanaffusga qadar har ikkala jamoada yaxshi imkoniyatlar bo‘ldi, to‘p darvoza to‘sinlariyu ustunlariga tegdi.

Ikkinchi bo‘limda Ronaldu qanotdan yetkazilgan uzatmani jarima maydoni ichida qabul qilib, 15 metrlardan aniq zarba bilan hisobni yirik ko‘rinishga keltirdi.

Go‘yoki o‘yin taqdiri hal bo‘lgandek edi. Ammo shundan so‘ng Anchelotti jamoasining muvaffaqiyatli yurishi boshlanib ketdi. Oradan ko‘p o‘tmasdan neaolliklar ikki daqiqa ichida gol urishga erishishdi. Bahs tugashiga 9 daqiqa qolganida esa mehmonlar jarima zarbasidan so‘ng hisobni tenglashtirishdi.

O‘yin durangga qarab borayotganida alamli avtogol "Yuventus"ga g‘alaba keltirdi. Jarima to‘pi o‘yinga kiritilganidan keyin Kulibali xavf yo‘q joyda to‘pni o‘z darvozasining "to‘qqizligi"ga joylab qo‘ydi.

Ushbu g‘alabadan keyin "Yuventus" o‘z ochkolarini 6taga yetkazib, A seriya jadvali peshqadamiga aylandi.

Italiya A seriyasi, 2-tur
Yuventus – Napoli 4:3 (2:0, 2:3)
Gollar: 1:0 – 16 Danilo, 2:0 – 19 Iguain, 3:0 – 62 Ronaldu, 3:1 – 66 Manolas, 3:2 – 68 Losano, 3:3 – 81 Di Lorenso, 4:3 – 90, avtogol Kulibali.
Yuventus – Shchensni, De Shilyo (Danilo, 15), Bonuchchi, de Ligt, Aleks Sandro, Xedira (Emre Jan, 60), Pyanich, Matyuidi, Duglas Kosta, Iguain (Dibala, 76), Ronaldu.
Napoli – Meret, Di Lorenso, Manolas, Kulibali, G‘ulom (Mariu Ruy, 46), Kalyexon, Zelinski, Allan (Elmaz, 74), Insinye (Losano, 46), Fabian Ruis, Mertens.
Ogohlantirishlar: G‘ulom (40), Di Lorenso (44), Matyuidi (52), Aleks Sandro (80), Duglas Kosta (83), Elmaz (90).