Angliya chempionatining 4-turini London derbisi yakunlab berdi. "Arsenal" o‘z maydonida "Tottenxem"ni qabul qilib, jangovar durangga imzo chekdi.

Bu natijadan har ikkala jamoa qoniqmagan bo‘lishi mumkin. "Tottenxem" birinchi bo‘limda yaratilgan imkoniyatlardan foydalanib, ikkita gol urishga muvaffaq bo‘ldi.

Bahsning 10-daqiqasida Lamela jarima maydoni chizig‘i ustidan kuchli zarba berdi. Leno qaytargan zarbani esa Kristian Eriksen yaqin masofadan darvozaga joylab qo‘ydi. Birinchi bo‘lim tugashiga 5 daqiqa qolganida hakam "kanonirlar" darvozasi tomon penalti belgiladi. Xarri Keyn 11 metrli jarima zarbasidan unumli foydalandi.

Birinchi bo‘limga qo‘shib berilgan daqiqalarda mezbonlar bitta javob to‘pini kiritishga muvaffaq bo‘ldi. "Arsenal" futbolchilari raqib jarima maydoni atrofida pressing qo‘llab to‘pni egallab olishdi. Lyakazett esa bir necha futbolchilarni aldab ichkariga kirdi va darvozani zabt etdi.

Ikkinchi bo‘limda Unai Emeri shogirdlari o‘z o‘yinlarini kuchaytirishdi. Ammo dastlab xavfli vaziyatlarni "shporlar" yaratishdi. Jumladan, Xarri Keynning zarbasidan keyin to‘p ustunga tegib qaytdi.

Uchrashuvning 71-daqiqasida hisob tenglashdi. Genduzi olis masofadan raqib jarima maydoni tomon ajoyib uzatma berdi. Obameyang esa to‘pni darvozaga burib yubordi.

"Arsenal" g‘alaba to‘pini ham kiritgandi, ammo VAR kichik ofsayd borligini aniqladi va gol bekor qilindi.

Natijada "Arsenal" va "Tottenxem" klublari 2 ochkodan yo‘qotishdi.

Angliya premyer-ligasi, 4-tur
Arsenal – Tottenxem 2:2 (1:2, 1:0)
Gollar: 0:1 – 10 Eriksen, 0:2 – 40, penalti Keyn, 1:2 – 45 Lyakazett, 2:2 – 71 Obameyang.
Arsenal – Leno, Kolashinas, Papastatopulos, David Luiz, Meytlend-Naylz, Torreyra (Sebalyos, 63), Genduzi, Jaka, Pepe, Lyakazett (Mxitaryan, 67), Obameyang.
Tottenxem – Lyoris, Rouz, Alderveyreld, Sanches, Vertongen, Eriksen, Uinks, Sissoko, Lamela (Alli, 60), Son Xin Min (Lo Chelso, 79), Keyn.
Ogohlantirishlar: Rouz (28), Lamela (32), Eriksen (57), Lyakazett (63), Uinks (74), Sanches (78), Papastatopulos (87), Jaka (90).