Professional boksning ikkinchi yarim yengil (-55,34 kg) vazn toifasida ringga chiqayotgan Murodjon Ahmadaliyev (7-0, 6 KO) 13 sentyabr kuni (Toshkent vaqti bilan 14 sentyabr) o‘zining navbatdagi jangini o‘tkazdi.
Unda Ahmadaliyevga kolumbiyalik tajribali bokschi Vilner Soto (22-7, 12 KO) raqiblik qildi.
GoSport.uz internet-nashri muxbirining xabar berishicha, Nyu-Yorkdagi «Medison Skver Garden» arenasidagi Hulu teatrida bo‘lib o‘tgan, 8 raundga mo‘ljallangan jang to‘rtinchi raundda nihoyasiga yetdi. Aynan to‘rtinchi raundning 1:56 soniyasi ortda qolganida Ahmadaliyev tomonidan berilgan ketma-ket zarbalar natijasida hakam jangni to‘xtatdi va texnik nokaut qayd etdi.
Natijada Ahmadaliyev o‘zining yettinchi jangida ham g‘alaba qozonishga muvaffaq bo‘ldi. Bu uning oltinchi muddatidan oldingi g‘alabasiga aylandi.
Eslatib o‘tamiz, 13 sentyabr kuni Murodjon Ahmadaliyev aslida WBA va IBF chempionlik kamarlari uchun Daniel Romanga (27-2-1, 10 KO) qarshi ringga chiqishi lozim edi. Ammo Roman jangga 10 kun qolganida o‘ng yelkasidan jarohat olgani vaji bilan ringga chiqishdan bosh tortgandi.
