Rossiyada davom etayotgan boks bo‘yicha jahon chempionatining chorak final bosqichi doirasida ringga ko‘tarilgan uchinchi o‘zbekistonlik sportchi g‘alaba qozonishga muvaffaq bo‘ldi.
69 kg. vaznda Bobousmon Baturov iordaniyalik Ziyod Eshashga qarshi jang olib bordi. Raqib bokschisi 1-raundda birinchi raqam ostida ishlashga harakat qilganiga qaramay, hamyurtimiz qarshi hujumda aniqroq zarba berdi.
Ikkinchi bo‘limdan boshlab Bobousmonning ustunligi oshib bordi va Ziyodga imkoniyat qoldirmadi — 5:0 (30:27, 30:27, 30:27, 30:27, 30:27).
Baturov yarim finalda Okazava (Yaponiya) / MakKormak (Angliya) juftligiga qarshi ringga ko‘tariladi.
Eslatib o‘tamiz, aavvalroq O‘zbekistonning ikki bokschisi — Shahobiddin Zoirov (52 kg.) va Miraziz Mirzaxalilov (57 kg.) yarim final yo‘llanmasiga ega bo‘lishgan edi.