Triatlon bo‘yicha O‘zbekiston terma jamoasi vakillari ham yirik xalqaro musobaqalarda ishtirok etishni boshladi. Ushbu oy vakillarimizni bir qator muhim startlar kutib turibdi. Jumladan, terma jamoamiz a’zolari 26-27 sentyabr kunlari Iordaniyaning Aqaba shahrida o‘tadigan xalqaro musobaqada ishtirok etadilar. Shundan so‘ng vakillarimizni Samarqandda 29 sentyabrda o‘tadigan O‘zbekiston kubogining final bosqichi kutib turibdi.
Mazkur musobaqalar murabbiylarimiz uchun, avvalo, terma jamoaning asosiy tarkibini saralab olish imkoniyatini yaratadi. Shuningdek, yoshlar va zahira tarkibni shakllantirib olish uchun ham asosiy start bo‘lib xizmat qiladi.
Terma jamoamiz vakillari ushbu mas’uliyatli musobaqalarga Fransiyada tayyorgarlik ko‘rishdi. Font-Romeu shahrida 15 avgustdan 8 sentyabrga qadar o‘tgan yig‘in sportchilarimizning jismoniy tayyorgarliklari uchun o‘ta muhim ahamiyat kasb etdi.
