Poytaxtimizda dzyudo bo‘yicha Gran-pri musobaqasining kechki dasturidan o‘rin olgan bellashuvlar boshlandi. Biroz avval musobaqaning -73 kilogrammgacha bo‘lgan vazn toifasida hamyurtimiz Hikmatilloh To‘rayev oltin medal uchun kurashda ishtirok etib, yana bir chempionlikni rasmiylashtirdi.
To‘rayevga raqiblik qilgan tojikistonlik Behruzi Hojazoda esa kumush medal bilan taqdirlandi. Ta’kidlash joiz, Hikmatilloh o‘tgan yili ham Toshkent Gran-prisida zafar quchgan edi. Aytish mumkinki, vakilimiz bu g‘alaba bilan o‘z chempionligini munosib himoya qildi.
