Dam olish kunlarida Eronning Urmiya shahrida karate WKF bo‘yicha yoshlar o‘rtasida “URMIA OPEN” xalqaro turniri bo‘lib o‘tdi. Ushbu musobaqada mamlakatimiz sportchilari ham o‘z omadlarini sinab ko‘rishdi.
Quvonarlisi, xalqaro turnirda hamyurtlarimizdan uch nafari sovrindorlar safidan joy olishdi. Jumladan, 16-17 yoshli sportchilar o‘rtasidagi bahslarda -55 kg vazn toifasida tatamiga chiqqan Ulug‘bek Aliboyev finalgacha yetib bordi va yakunda kumush medal bilan taqdirlandi.
Xuddi shu yoshdagi sportchilar o‘rtasida -68 kg vazn toifasida vatanimiz sharafini himoya qilgan Shohruh Tursunmaxammatov ham 2-o‘ringa munosib ko‘rildi. Uning tengdoshi, -76 kg vazn toifasidagi bahslarda ishtirok etgan Quvonch Muhammadiyev esa 3-o‘ringa sazovor bo‘ldi.
Jismoniy tarbiya va sport vazirligi
Matbuot xizmati
