Xabaringiz bor, Coca Cola Superliga 21-turidan o‘rin olgan bahsda “Navbahor” o‘z maydonida Samarqandning “Dinamo” klubini qabul qiladi. Mazkur o‘yinga jamoamiz a’zolari jiddiy tayyorgarlik ko‘rishmoqda. “Lochinlar”ning navbatdagi mashg‘ulotlari yakunlangach, namanganliklarning tajribali himoyachisi Obid Jo‘raboyev bo‘lajak uchrashuv borasida o‘z fikrlarini bildirdi.
- Mashg‘ulotlarda barchamiz astoydil ter to‘kyapmiz. Chunki bo‘lajak bahsda zafar quchib, ishqibozlarni quvontirishimiz shart. Boisi, muxlislar “Navbahor”ning o‘z maydonidagi g‘alabasini sog‘inishdi.
To‘g‘ri, “Dinamo”ning 2-davra o‘yinlarida omadi kelmay, mag‘lubiyatlar girdobidan chiqolmayapti va ayni paytda turnir jadvalining quyi pog‘onasida bormoqda. Ammo raqibni mensimaslik, xotirjamlikka berilish yaxshilikka olib kelmasligi futbolda ko‘p marotaba o‘z isbotini topgan. Shuning uchun samarqandliklar bilan bo‘lib o‘tadigan uchrashuvga jiddiy tayyorgarlik ko‘ryapmiz.
Muxlislardan “Dinamo”ga qarshi kechadigan bahsda stadionni to‘ldirgan holda, jamoamizni munosib tarzda qo‘llab-quvvatlashlarini iltimos qilaman.
Biz – futbolchilar esa ularning ishonchlarini oqlash, zafar quchish uchun barcha imkoniyatimizni ishga solamiz.
“Navbahor” – “Dinamo” uchrashuviga tashrif buyurib, bizni 12-o‘yinchi sifatida qo‘llab-quvvatlang, aziz muxlislar!
“Navbahor” PFK matbuot xizmati.
