"Yuventus" yarim himoyachisi Adrian Rabyo jamoani tark etish haqida o‘ylay boshladi. Fransiyalik futbolchi va uning onasi Veronik "keksa sinyora" safidagi o‘yin amaliyotidan qoniqish hosil qilmayapti. Shu bois, 24 yoshli futbolchi Turinni tark etishi mumkin.

Ispaniya matbuoti tarqatgan xabarga ko‘ra, Rabyo faoliyatini davom ettirishi mumkin bo‘lgan variantlardan biri sifatida "Barselona" qaralmoqda. Ma’lumotlarga qaraganda, futbolchining onasi "ko‘k-anorranglilar" rahbariyati bilan aloqaga chiqdi.

Avvalroq Rabyoning "Barselona"ga o‘tishi kutilgandi. Tomonlar bu borada kelishuvga erishishgandi. Biroq o‘yinchining onasi kataloniyaliklardan taklif qilingan maoshdan ko‘prog‘ini talab qilishi natijasida "ko‘k-anorranglilar" Adrian bilan shartnoma imzolamaslikka qaror qilishgan edi.

Rabyo yozgi transfer paytida erkin agent sifatida "Yuventus" safiga qo‘shildi. Italiya chempionatining ushbu mavsumida u 4ta o‘yinda maydonga tushdi. Uning taxminiy narxi 35 million yevroga baholangan.