7-21 sentyabr kunlari Rossiyaning Yekaterinburg shahri mezbonlik qilgan boks bo‘yicha jahon chempionatida O‘zbekiston terma jamoasi olamshumul natija bilan bilan umumjamoa hisobida birinchi o‘rinni qo‘lga kiritgani barchaga ma’lum. Shubhasiz, bunday natijalar zamirida terma jamoa bosh murabbiyining xizmati beqiyos.

Hukumatimiz o‘z kasbiga mehr qo‘yib, uni sidqidildan bajarayotgan insonlarni bee’tibor qoldirmaydi. O‘zbek boksining ayni paytda erishgan yutuqlarida, boksimizning dunyodagi eng kuchli maktab bo‘lishida ulkan xissa qo‘shgan terma jamoa bosh murabbiyi Marat Galiyevich Qurbonov mehnatlariga yarasha munosib taqdirlandi. Bugun O‘zbekiston Milliy olimpiya qo‘mitasida Marat Qurbonovga Prezident sovg‘asi – “Treker” avtomobili va 100 million so‘m pul mukofoti topshirildi.

“Mehnatlarimizni munosib taqdirlayotgan hukumatimizga o‘z minnatdorchiligimni bildirib qolaman. Bunday natijalar qayd etishimizda bizning bir jamoa bo‘lib ishlayotganimizning o‘rni katta. Nasib qilsa, kelasi yil Tokioda o‘tadigan Olimpiya o‘yinlarida ham o‘zbek boksining nimalarga qodir ekanligini yana bir karra namoyish etib beramiz”, – dedi Marat Qurbonov.

Taqdirlash jarayonida so‘z olgan O‘zbekiston Milliy olimpiya qo‘mitasi prezidenti Rustam Shoabdurahmonov, MOQ vise-prezidenti, O‘zbekiston boks federasiyasi raisining birinchi o‘rinbosari Saken Polatov Marat Galiyevichning uzoq yillik mehnatlarini alohida ta’kidlab, kelgusi faoliyatida ham ulkan omad va salomatlik tilab qolishdi.