Gollandiyalik mutaxassis Gus Xiddink Xitoy Olimpiya terma jamoasi bosh murabbiyligidan ozod etildi. Fox Sports xabariga ko‘ra, uning o‘rnini Xitoy ayollar jamoasining sobiq bosh murabbiyi Xao Vey egallaydi.

Xabar qilinishicha, 72 yoshli mutaxassisning ishdan olinishiga uning matbuot bilan aloqa uslubi Xitoy Futbol Assosasiyasini qoniqtirmaganligi hamda jamoa o‘yinidagi qoniqarsiz natijalar sabab bo‘lgan.

Ta’kidlanishicha, ushbu qarorning asosiy omili Xitoy U23 jamoasining Osiyo chempionatiga tayyorgarlik doirasida Vyetnam U23 bilan o‘rtoqlik o‘yinidagi mag‘buliyatga uchrashi bo‘lgan.

Gus Xiddink o‘tkan yilning sentyabr oyida Xitoy Olimpiya terma jamoasiga bosh murabbiy etib tayinlandi va uning qo‘l ostida jamoa Osiyo chempionatiga yo‘llanmani qo‘lga kiritdi.

Masalan, Xitoy Osiyo chempionati saralash o‘yinlarida Laosni 5:0, Fillipinni 8:0ga yutib, Malayziya bilan 2:2 o‘ynagan va guruhda birinchi o‘rinni olib yo‘llanmaga ega chiqqan.

Eslatib o‘tamiz, Xitoy olimpiya terma jamoasi Osiyo chempionatining final bosqichida O‘zbekiston bilan bir guruhdan o‘rin olgan. Shuningdek, bu guruhdan Janubiy Koreya va Eron termalari ham o‘rin olishgan.