Coca Cola Superliga 22-turidan o‘rin olgan bahsda “Navbahor” Termizda “Surxon” mehmoni bo‘ladi. Bo‘lajak bahs oldidan “Navbahor”ning rossiyalik yarim himoyachisi Ivan Solovyov o‘z fikrlarini bildirib o‘tdi.

- “Surxon”ga qarshi kechadigan prinsipial bahsga jiddiy tarzda tayyorgarlik ko‘rdik. Jumladan, mazkur o‘yinga tayyorgarlik jarayoni doirasida o‘tgan yakshanba kuni “Andijon”ga qarshi o‘rtoqlik bahsi o‘tkazib, 2:0 hisobida g‘alaba qozondik.

Albatta, ushbu yutuq ham bo‘lajak uchrashuv oldidan biz – futbolchilarning kayfiyatlariga ijobiy ta’sir ko‘rsatadi, degan umiddaman. Chunki Termizga yaxshi kayfiyatda yo‘l oldik.

O‘tgan turda “Dinamo”ni mag‘lubiyatga uchratib, ustozimiz Andrey Antanasovich Kanchelskis qaytganidan so‘ng, ilk g‘alabani nishonlashga muvaffaq bo‘ldik.

Umid qilamanki, jamoamizning g‘alabali odimi joriy mavsum yakunigacha davom etadi.

Shuningdek, “Navbahor”da sovrindorlar safidan o‘rin olish imkoniyati bor va kuchli uchlikdan o‘rin olish uchun qo‘limizdan kelganicha harakat qilamiz.

Oldimizda eng avvalo “Surxon” bilan bo‘lib o‘tadigan o‘yin turibdi hamda mazkur bahsda g‘alaba qozonib, muxlislarga quvonch ulashish niyatidamiz.

“Navbahor” PFK matbuot xizmati.