Coca Cola Суперлига 22-туридан ўрин олган баҳсда “Навбаҳор” Термизда “Сурхон” меҳмони бўлади. Бўлажак баҳс олдидан “Навбаҳор”нинг россиялик ярим ҳимоячиси Иван Соловьёв ўз фикрларини билдириб ўтди.

- “Сурхон”га қарши кечадиган принципиал баҳсга жиддий тарзда тайёргарлик кўрдик. Жумладан, мазкур ўйинга тайёргарлик жараёни доирасида ўтган якшанба куни “Андижон”га қарши ўртоқлик баҳси ўтказиб, 2:0 ҳисобида ғалаба қозондик.

Албатта, ушбу ютуқ ҳам бўлажак учрашув олдидан биз – футболчиларнинг кайфиятларига ижобий таъсир кўрсатади, деган умиддаман. Чунки Термизга яхши кайфиятда йўл олдик.

Ўтган турда “Динамо”ни мағлубиятга учратиб, устозимиз Андрей Антанасович Канчельскис қайтганидан сўнг, илк ғалабани нишонлашга муваффақ бўлдик.

Умид қиламанки, жамоамизнинг ғалабали одими жорий мавсум якунигача давом этади.

Шунингдек, “Навбаҳор”да совриндорлар сафидан ўрин олиш имконияти бор ва кучли учликдан ўрин олиш учун қўлимиздан келганича ҳаракат қиламиз.

Олдимизда энг аввало “Сурхон” билан бўлиб ўтадиган ўйин турибди ҳамда мазкур баҳсда ғалаба қозониб, мухлисларга қувонч улашиш ниятидамиз.

“Навбаҳор” ПФК матбуот хизмати.