Italiyaning «Inter»  va Gollandiya terma jamoasi yarim himoyachisi Uesli Sneyder Lionel Messi va Krishtianu Ronaldular bilan bir xil saviyada bo‘lishi mumkinligini, ammo buni o‘zi xohlamaganligini gapirib berdi.

— Ishonchim komilki, agar o‘z kuchimni 100 foiz sarflab, o‘z ustimda tinimsiz ishlaganimda Messi va Ronaldular saviyasida bo‘lgan bo‘lar edim. Men buni bilaman, — Sneyderning so‘zlaridan iqtibos keltirmoqda Voetbalzone.

— Men buni xohlamaganman va bundan afsuslanmayman. Gap men buni qila olmasligimda emas, men buni xohlamaganligimda. Men o‘z faoliyatidan zavqlanganman. Menga futbol o‘ynash shunchaki yoqardi. Men nimani yutish mumkin bo‘lgan bo‘lsa, barchasini yutganman, shu boisdan faoliyatim haqida bir sekundga ham afsuslanmayman. Men jamoaviy o‘yin futbolchisiman va o‘ylaymanki, bu jamoa muvaffaqiyati uchun juda muhim narsa. Oradan 10 yil o‘tgan bo‘lsada, odamlar haliyam men 2010 yili “Oltin to‘p”ni yutishim mumkinligi haqida gapirishadi. Biroq, menda bu borada muammo yo‘q. Men doim aytaman: «Yigitlar, men Yevropa Chempionlari Ligasini yutganman. Menga yakka sovrinlardan ko‘ra, jamoaviy sovrinlar muhimroq edi».

Uesli Sneyder joriy yilning avgust oyida futbolchilik faoliyatini yakunladi. U Gollandiya terma jamoasi safida 134 ta uchrashuvda maydonga tushdi va terma jamoasi rekordchisi hisoblanadi. 2009/10 yilgi mavsumda Sneyder “Inter” klubi bilan trebl qilgan (Italiya chempionligi, Italiya Kubogi, YECHL — muallif.)  va terma jamoasi bilan Jahon chempionatining finaligacha yetib borgan.