O‘z tarixida ilk marta Yevropa chempionlar ligasida ishtirok etayotgan "Atalanta" mo‘jiza tufayli keyingi bosqich yo‘llanmasini qo‘lga kiritdi.

Bergamoliklar dastlabki 3ta turda mag‘lubiyatga uchrashgan edi. Qolgan 3ta o‘yinda qo‘lga kiritilgan 7 ochko "Atalanta"ni pley-offga olib chiqdi.

Italiyaliklarga qarshi o‘z uyidagi o‘yinda "Shaxtyor"ni durang natija ham qanoatlantirar edi. Uchrashuv davomida har ikkala jamoa ko‘plab vaziyatlar yaratishdi, ammo ularni yakunlashda doneskliklarga mahorat yetishmadi. Ikkinchi bo‘lim o‘rtalarida mehmonlar tomonidan uyushtirilgan kombinasiya o‘z samarasini berdi va Kastan hisobni ochdi.

77-daqiqada "Shaxtyor" futbolchisi raqib yuziga ataylab urgani uchun maydondan chetlatildi. Oradan 3 daqiqa o‘tib esa "Atalanta" hisobdagi farqni ikkitaga oshirdi. Burchakdagi bayroq yaqinidan uzatib berilgan to‘p yo‘nalishini Pashalich oyog‘i bilan biroz o‘zgartirgani Pyatovni chalg‘itib qo‘ydi.

Ikkinchi bo‘limga qo‘shib berilgan daqiqalarda esa himoyachining qo‘pol xatosidan keyin Gosens ukrainaliklar darvozasiga uchinchi to‘pni yo‘lladi.

Pley-off yo‘llanmasini muddatidan avval qo‘lga kiritgan «Manchester Siti» klubi so‘nggi turda Zagrebda "Dinamo" klubi mehmoni bo‘lib, yirik hisobda g‘alaba qozondi. Gabriyel Jezus "xet-trik"ni rasmiylashtirdi.

Shu tariqa, «Atalanta» 7 ochko bilan guruhda 2-o‘rinni egalladi va keyingi bosqichga yo‘l oldi. "Shaxtyor" esa o‘z yurishini Yevropa ligasida davom ettiradi.

Yevropa chempionlar ligasi,
"C" guruhi, 6-tur
Shaxtyor Ukraina – Atalanta Italiya 0:3 (0:0)
Gollar: 0:1 – 66 Kastan, 0:2 – 80 Pashalich, 0:3 – 90 Gosens.
Shaxtyor – Pyatov, Dodo, Krivsov, Matviyenko, Ismaili, Tayson, Alan Patrik, Kovalenko (Solomon, 71), Stepanenko, Tete (Marlos, 59), Morayes.
Atalanta – Gollini, Gosens, Palomino, Masyello (Malinovskiy, 61), Kastan, Pashalich, de Ron, Gomes (Xatebur, 90), Froyler, Gimshiti, Muriel (Rojer, 71).
Ogohlantirishlar: Muriel (23), Alan Patrik (50), Dodo (63), Froyler (74), Xatebur (90).
Chetlatish: Dodo (77).

Dinamo Zagreb Xorvatiya – Manchester Siti Angliya 1:4 (1:1, 0:3)
Gollar: 1:0 – 10 Olmo, 1:1 – 34 Gabriel Jezus, 1:2 – 50 Gabriel Jezus, 1:3 – 54 Gabriel Jezus, 1:4 – 84 Foden.
Dinamo Zagreb – Livakovich, Mubandje, Stoyanovich, Dilaver, Ademi, Moro, Goyak (Mayer, 81), Orshich (Xayrovich, 81), Olmo, Kondzer (Djira, 59), Petkovich.
Manchester Siti – Bravo, Mendi, Joau Kanselu, Erik Garsiya, Otamendi (Xarvud-Bellis, 82), Rodri Ernandes (Sterling, 73), Gyundogan, Bernardu Silva, Foden, Marez, Gabriel Jezus (Zinchenko, 66).
Ogohlantirish: Ademi (34).