Taniqli Transfermarket nashri yaqindagina o‘z fubolchilarning transfer narxini yangiladi. Bu jamoalarning umumiy qiymatida ham o‘z aksini topishi turgan gap. Bugun ushbu nashr bergan ma’lumotlarga ko‘ra, dunyoning eng qimmat 5 ta jamoasi nomini bilib olamiz.

5-o‘rin PSJ

Parij jamoasi o‘z safini yangidan yangi yulduzlar bilan to‘ldirayotganiga qaramay, o‘z tan narxini tobora yo‘qotib bormoqda. Transfermarket nashri klubning umumiy qiymatining 50 million yevroga arzonlaganini ma’lum qilishiga qaramay, parijliklar 5-o‘rindan tushib ketishmadi. Ayni damda jamoaning umumiy qiymati 1,01 milliard yevroni tashkil etmoqda. Jamoaning umumiy qiymati pasayishida Neymar va Kavanining tutgan o‘rni “beqiyos”. Braziliyalik futbolchining faoliyati davomida ilk bor transfer narxining pasayishi kuzatildi. Yana 20 million yevroga! Kavani esa, qisqa fursat ichida 15 million yevroga arzonlab ketdi.

4-o‘rin “Real Madrid”

“Qirollik klubi” bir necha yil davomida Ispaniyaning eng qimmat jamoasi maqomini hech kimga bermay kelayotgan edi, biroq transfermarket narxlarni yangilagach, “Barselona”ni o‘zlaridan oldinga o‘tkazib yuborishdi. Ayni damda “qaymoqranglilar”ning umumiy qiymati 1,07 milliyardga teng. Yangi belgilangan narxlar sababli klub 110 million yevro yo‘qotdi. “Real Madrid” futbolchilarining deyarli barchasi arzonlab ketdi. Ramos va Benzema Yoshi o‘tgani bois pastroq ko‘rsatgich qayd etgani tabiiy, biroq Vinisiusning ham tavon puli 20 millionga (Avvalroq 70 million edi.) pastlagani e’tiborga molik. Shuningdek, jamoaning eng qimmat futbolchisi Eden Azar ham “arzonlab ketdi”. Madriddagi ilk yarim yili davomida yarim himoyachi 30 million yevro yo‘qotdi. “Chelsi” klubida bunday xolat biror marotaba ham kuzatilmagan edi.

3-o‘rin “Barselona”

Katoloniya jamoasi umumiy hisobda 80 million yevro yo‘qotgan bo‘lsada, Ispaniyaning eng qimmat jamoasi maqomini (umumiy qiymati 1,09 milliyard yevro) salqab qolishga muvaffaq bo‘ldi. Asosiy tarkibdagi futbolchilardan Antuan Grizman, Pike, Suares, Vidal, Rakitich va xatto Messi ham biroz arzonlashga majbur bo‘ldi. O‘zining 6-“oltin to‘p”ini qo‘lga kiritgan hujumchi 3 haftadan so‘ng naqd 10 million yevro yo‘qotgani e’tiborga molik. Shunday bo‘lsada, argentinalik futbolchining ishlari Usman Dembelenikidan ancha yaxshiroq. Yil boshida 100 milliondan ortiqroqqa baxolangan hujumchining ayni damda transfer qiymati 75 million yevroga teng.

2-o‘rin “Liverpul”

YECHL g‘olibligidan so‘ng, klub 110 million yevroga qimmatladi va ikkinchi o‘ringa ko‘tarilib oldi. Endilikda ushbu jamoada eng qimmat himoyachi va eng qimmat qanot himoyachilari to‘p surmoqda. Hujumchilar orasida Sadio Mane va Roberto Firminoning transfer narxi ko‘tarilgan. Hujum uchligining so‘nggi vakili Muhammad Salah esa, qariyb bir yarim yildan beri o‘z qiymatidan arzonlaganicha yo‘q. Shuningdek, Fabinyo, Alisson va Matipda ham biroz o‘sish kuzatilgan. Hozirda APL peshqadamining umumiy qiymati 1,18 milliyard yevroni tashkil etadi.

1-o‘rin “Manchester Siti”

“Shaharliklar” o‘tgan mavsumda bu ko‘rsatgich borasida yetakchilikni hech kimga berishmagan edi. So‘nggi yangilanish amalga oshirilgach, klub yana 40 million yevroga qimmatladi va sayyoramizning eng badavlat jamoasi maqomini o‘zida ushlab qoldi. Eng qizig‘i shundaki, klub safida atigi ikkita futbolchining transfer qiymati ko‘tarildi. Ulardan biri - Kevin De Bryoyne Belgiyaning eng qimmat futbolchisi maqomiga ega bo‘lgan bo‘lsa, ikkinchisi Keyndan eng qimmat ingliz futbolchisi unvonini tortib olgan Rahim Sterling.