Taqdirning o‘zi Klopp jamoasi chempion bo‘lishini istayapti chog‘i.

Oddiy misol. Yangi yil oldi "Liverpul" bilan o‘ynovchi klub "Manchester Siti" sinovidan yarador bo‘lib kelyapti.

Chempionlik uchun kurashayotgan Pepning o‘zi "Lester"ni yiqitib berdi, "Liverpul" tepkilab tashladi.

"Vulverxempton" bilan ham shunday bo‘ladi deb o‘ylagandik. Yo‘q, Nunu Eshpiritu shogirdlari Gvardiola erkatoylarini ikkinchi marta jazolashdi. To‘g‘ri, bu masalada portugaliyalik mutaxassisga Ederson va Mendi ko‘mak berib yuborgandir, lekin yodimizda natija qoladi.

Bugun "Siti"dan uch ochko olgan "bo‘rilar" Enfildga kelishadi. Yarador holda. Bo‘rining yaralangani yomon bo‘ladi, deyishadi. Ko‘ramiz endi.

"Vulvz"ga butun dunyo qarab turibdi: Kloppning fantastik klubini mavsum davomida to‘xtatishi mumkin bo‘lgan yagona umid sifatida...

Liverpulliklar oldida esa, 2020 yilga superfarq bilan chiqib ketish imkoniyati paydo bo‘ldi. Yilni yakunlab olish uchun futbol vatanida bundan-da telbaroq hodisa o‘ylab topish imkonsiz edi.

London derbisidan keyin hech qayerga ketib qolmang, mavsum desertini ham paqqos tushirib olish zarar qilmaydi.

Xizmatingizdaman!)

Xayrulla HAMIDOV.