Тақдирнинг ўзи Клопп жамоаси чемпион бўлишини истаяпти чоғи.

Оддий мисол. Янги йил олди "Ливерпуль" билан ўйновчи клуб "Манчестер Сити" синовидан ярадор бўлиб келяпти.

Чемпионлик учун курашаётган Пепнинг ўзи "Лестер"ни йиқитиб берди, "Ливерпуль" тепкилаб ташлади.

"Вулверхэмптон" билан ҳам шундай бўлади деб ўйлагандик. Йўқ, Нуну Эшпириту шогирдлари Гвардиола эркатойларини иккинчи марта жазолашди. Тўғри, бу масалада португалиялик мутахассисга Эдерсон ва Менди кўмак бериб юборгандир, лекин ёдимизда натижа қолади.

Бугун "Сити"дан уч очко олган "бўрилар" Энфилдга келишади. Ярадор ҳолда. Бўрининг яралангани ёмон бўлади, дейишади. Кўрамиз энди.

"Вулвз"га бутун дунё қараб турибди: Клоппнинг фантастик клубини мавсум давомида тўхтатиши мумкин бўлган ягона умид сифатида...

Ливерпулликлар олдида эса, 2020 йилга суперфарқ билан чиқиб кетиш имконияти пайдо бўлди. Йилни якунлаб олиш учун футбол ватанида бундан-да телбароқ ҳодиса ўйлаб топиш имконсиз эди.

Лондон дербисидан кейин ҳеч қаерга кетиб қолманг, мавсум десертини ҳам паққос тушириб олиш зарар қилмайди.

Хизматингиздаман!)

Хайрулла ҲАМИДОВ.