Janubiy Koreya bilan o‘yindan so‘ng, olimpiya terma jamoamiz yetakchisi Sanjar Qodirqulov o‘z fikr va mulohazalari bilan o‘rtoqlashdi.

– Sanjar nega sizni o‘z pozisiyangizda to‘p surmayapsiz?

– Olimpiya jamoamizga kelib qo‘shilganimdan so‘ng, meni qanotga qo‘yishmoqda. Buning sababini murabbiydan so‘rab o‘tirishga xojat yo‘q. Menga qanotda to‘p surish vazifasi topshirildimi, tamom harakat qilish kerak.

– Sizni markazdagi o‘yinlaringiz orqali taniganimiz. O‘zingiz uchun yangi pozisiya nuqulayliklar tug‘dirmayaptimi?

– Avvalari qanot himoyachisi vazifasini bajarar edim, bu yildan boshlab murabbiylar meni markazga ko‘chirishdi. Shuning uchun ham biroz noqulayliklar paydo bo‘lmoqda, biroq barcha muammolarni yuzaga chiqaramaslikka harakat qilyapman.

– Janubiy Koreya bilan Seulda boshqacharoq o‘yin namoyish etgan edinglar. Bugun nega jamoamizning o‘yini chiqmadi?

– Albatta, biz Seulda birorta o‘yinda maydonga tushmasdan turib kuchga to‘lgan xolda to‘p surgan edik. Bugun ularning yettita futbolchisi dam olgan xolda maydonga tushdi. Bizda esa, uchta o‘yindan beri deyarli asosiy tarkib harakat qilmoqda. Bunday issiq ob-havoda terlab katta kuch yo‘qotganimiz bois tiklanib olish jarayoniga vaqt yetmayapti. Buni inobatga olishimiz kerak.

– Nima deb o‘ylaysiz, guruhdan chiqishimiz uchun ko‘p kuch sarf etib yubormadikmi?

– O‘zi bu guruhdan chiqishimiz katta so‘roq ostida turgandi. Birinchi navbatda, guruhdan chiqish vazifasi qo‘yilgan edi. Buni uddaladik. Endi niyatimiz sari dadil qadam tashlaymiz.

– Negadir yigitlar katta bosim ostida harakat qilishdi. Bu jamoaviy o‘yinga to‘sqinlik qilgandek tuyuldi?!

– Birinchi navbatda Janubiy Koreyaga qarshi harakat qilyapmiz. Ikkinchidan xalqimiz o‘yinni tomosha qildi. Boz ustiga, guruhda chiqish masalasi to‘liq hal etilmagan ham edi. Raqiblarimiz esa, vazifani bajarib bo‘lgani uchun ortiqcha bosimsiz mazza qilib to‘p surdi. Bugungi o‘yinimizning chiqmaganiga shu sabab deb o‘ylayman.