Shedevr asarlar boshqa asarlardan nimasi bilan farq qiladi? Zamon tanlamasligi bilan, albatta. O‘sha kunning siyosatidan yuqori turishida...
Shu bois ham “qay davrda yozilgan yo qay davrda chizilgan bu asar?” deb so‘raladi shedevrlar.
“Stemford Brij”dagi kechagi bahs ham shu asarlar sirasidan bo‘ldi. Jamoalar chempionatdagi holatlarini unutishdi. Turnir jadvali umuman esda yo‘q edi. Bir futbolchining maydondan chetlatilishi, deysizmi? Bu ham chikora. O‘ynash kerak, bo‘ldi. Shedevrlar shunday yoziladi.
Hissiyotlarga limmo-lim kechgan o‘yinda murabbiylarning chizmalari-da ko‘rinmay ketdi. Aslida chetda o‘yinni asabiy tomosha qilayotgan Arteta ham, Lempard ham biz bilmagan holda o‘z yurishlarini amalga oshirishmagan, deysizmi? Yo‘q, ularning imzolari bor edi. Biroq, ular bu asarga ta’sir o‘tkaza oladigan darajada imzo cheka olmasdilar. Portretning bir chetidagi imzo kabi ilg‘ash mushkul qo‘l edi bu.
Asarning tom ma’nodagi mualliflari - maydondagi 21 futbolchi, ha, 21 futbolchi edi. Shedevr yozish uchun telbalarcha o‘ynash kerak.
Jang qahramonlarni tug‘adi, deganlaridek, bu o‘yin ikki tomonning-da jangiga aylanib ketishini kutdik. London jangi deb ataldi bu, ha.
Derbilar shunaqa o‘tishi kerak, degan joyiga reytingning yuqorisi shu o‘yinga ajratilishi kerak. So‘nggi soniyalargacha, so‘nggi tomchigacha...
O‘yin soat 19:00da takroran efirga uzatiladi. Men ko‘rib qo‘ymoqchiman. Chunki nima deganimni, qanday hislar ortida qolganimni eslay olmayapman. Arteta va Lempard singari nima bo‘layotganini tushuna olmagandim kecha. Menimcha, futbolchilarning o‘zlari ham boshqatdan ko‘rib chiqishsa kerak. Ular ham o‘zlarida emasdilar.
Ha, shedevrlar shunaqa yoziladi. Soat 19:00gacha olimpiyachilarimiz Olimpiada yo‘llanmasini qo‘lga kiritishsa bormi, London jangini eng yuqori notalarga chiqqan his-tuyg‘ular ostida ko‘ramiz.
Vuh!!!
