2016 yil Jasur Abduraimov murabbiylik qilgan O‘zbekiston yoshlar termasi Bahraynda o‘tgan qit’a chempionatining chorak finalida Erondan yengilib, mundial yo‘llanmasini boy bergandi. O‘shanda jamoani ayblamaganmiz, chunki yigitlar munosib o‘ynashgan, mazmunli o‘yinlar ko‘rsatishgan. O‘sha jamoa asosini 1997 yilda tavallud topgan yigitlar tashkil qilgandi.
2020 yil Lyubinko Drulovich murabbiylik qilgan O‘zbekiston olimpiya termasi Tailandda o‘tgan qit’a chempionatining yarim finalida Saudiya va keyin Avstraliyadan yengilib, Olimpiada yo‘llanmasini boy berdi. Men bugun yigitlarni ayblashni istamayman, chunki ular munosib o‘ynashdi, mag‘lub bo‘lganlaridan kuchsiz emasliklariga ishontirishdi, biroq natija qila olishmadi. Bu jamoa asosini 1997 yilda tavallud topgan yigitlar tashkil qilgandi.
Hali Parij Olimpiadasida ham o‘ynashi mumkin bo‘lgan 18 yoshli posbonni ham, muhim o‘yinda jamoani qiyin ahvolda qoldirgan Oybek Bozorovni ham, boshqalarni ham ayblamoqchimasman. Futbolimiz o‘zida bor kamchiliklar uchun javob berishda davom etmoqda. O‘sha kamchiliklar uchun hammamiz birdek aybdormiz.
