Anons qilmaganimga ham ancha bo‘ldi. Bugun qayta yo‘lga qo‘yamiz. Sabab ham arzigulik. APLda kun afishasi. "Lester" - "Chelsi". Bu klublar ayni vaqtda jadvalda yonma-yon ketishmoqda. Lekin bunga urg‘u bermagan bo‘lardim. Chunki o‘rtadagi farq — 8 ochko. Ha, Premyer liga yuqori pog‘onalarida ayni vaqtda zichlik kamaygan.

Klublar go‘yoki so‘nggi sprint oldidan kuch to‘playotgandek. "Lester" transfer qildi, himoyani kuchaytirdi. "Chelsi" qanday kuch to‘pladi? Hech qanday. Lempardni rahbariyat yolg‘izlatib qo‘ydi. O‘zi yosh murabbiy, shogirdlari ko‘pi yosh, shu joyida 1-2 top-o‘yinchi zarar qilmasdi. Buning ustiga transfer qilish huquqi klubga qaytarildi. Matbuot anjumanida ham Frenkidan asosan transferdagi passivlik borasida so‘rashdi. Natijada Lempard mavsumdagi eng qisqa konferensiya o‘tkazdi. U xafa. Klubdan, menimcha.

Bu mavsum "Chelsi"dan medallar kutish noto‘g‘ri, YECHL yo‘llanmasi yetarli. "Lester" esa Rodjers boshchiligida bronzaga qarab ketyapti. Bu murabbiy hali "Chelsi"ni yutmagan ekan. Bugun imkoniyati bor. Birgalikda ko‘ramiz!

Davron Fayziyev.