Анонс қилмаганимга ҳам анча бўлди. Бугун қайта йўлга қўямиз. Сабаб ҳам арзигулик. АПЛда кун афишаси. "Лестер" - "Челси". Бу клублар айни вақтда жадвалда ёнма-ён кетишмоқда. Лекин бунга урғу бермаган бўлардим. Чунки ўртадаги фарқ — 8 очко. Ҳа, Премьер лига юқори поғоналарида айни вақтда зичлик камайган.

Клублар гўёки сўнгги спринт олдидан куч тўплаётгандек. "Лестер" трансфер қилди, ҳимояни кучайтирди. "Челси" қандай куч тўплади? Ҳеч қандай. Лэмпардни раҳбарият ёлғизлатиб қўйди. Ўзи ёш мураббий, шогирдлари кўпи ёш, шу жойида 1-2 топ-ўйинчи зарар қилмасди. Бунинг устига трансфер қилиш ҳуқуқи клубга қайтарилди. Матбуот анжуманида ҳам Фрэнкидан асосан трансфердаги пассивлик борасида сўрашди. Натижада Лэмпард мавсумдаги энг қисқа конференция ўтказди. У хафа. Клубдан, менимча.

Бу мавсум "Челси"дан медаллар кутиш нотўғри, ЕЧЛ йўлланмаси етарли. "Лестер" эса Роджерс бошчилигида бронзага қараб кетяпти. Бу мураббий ҳали "Челси"ни ютмаган экан. Бугун имконияти бор. Биргаликда кўрамиз!

Даврон Файзиев.