O‘zbekiston Respublikasi Prezidentining 2019 yil 4 dekabrdagi “O‘zbekistonda futbolni rivojlantirishni mutlaqo yangi bosqichga olib chiqish chora-tadbirlari to‘g‘risida”gi Farmonida belgilangan vazifalar ijrosini ta’minlash maqsadida O‘zbekiston futbol assosiasiyasi hududlardagi bolalar-o‘smirlar sport maktablarining futbol bo‘limlari, futbol mahorat maktablari, ixtisoslashtirilgan futbol maktablarida mavjud shart-sharoitlarni yaqindan o‘rganish, ularning infratuzilmasi va moddiy-texnik bazasini yanada mustahkamlash borasida ish olib bormoqda.

Respublikamizning barcha viloyatlarida bu boradagi mavjud vaziyatni to‘liq o‘rganib chiqish maqsadida O‘FA mutaxassislaridan iborat ishchi guruhlar tuzildi. Mutaxassislar dastlab Toshkent viloyatida bo‘lib, bolalar va o‘smirlar futbolidagi shart-sharoit, kamchiliklar bilan tanishib chiqishdi.

Dastlab O‘FA ishchi guruh Angren, Ohangaron hamda Olmaliq shaharlarida bo‘ldi. Shuningdek, O‘rta Chirchiq, Bekobod, Oqqo‘rg‘on, Nurafshon, Piskentga ham tashrif buyurilib, bolalar-o‘smirlar sport maktablari futbol bo‘limlarining ish-faoliyati, futbol to‘garaklarining zarur inventarlar bilan ta’minlanganligi, murabbiylarning zamonaviy metodlar asosida mashg‘ulotlar olib borayotgani o‘rganildi.

Yangiyo‘l tumanida joylashgan viloyatning asosiy futbol maskani bo‘lmish Futbol mahorati maktabi faoliyati atroflicha o‘rganib chiqildi.

Ma’lumki, viloyat futbol assosiasiyalari joylarda mazkur sport turining rivojlanishiga bevosita mas’ul sanaladi. Shu boisdan ishchi guruh Toshkent viloyati futbol assosiasiyasining bugungi kundagi ish jarayoni, 2020 yilda amalga oshirilishi mo‘ljallangan rejalari bilan yaqindan tanishdi.

Toshkent viloyatida o‘zbek futbolida o‘z mavqeyiga ega 2 ta professional futbol klub faoliyat olib boradi. Ayni vaqtda AGMK va “Metallurg” klublari yangi mavsumga tayyorgarlik olib borishmoqda. Ushbu klublarning stadionlari yangi mavsumga qay darajada tayyor ekani ham ko‘zdan kechirildi. Shuningdek, stadionlarda VAR tizimini joriy etish bo‘yicha olib borilayotgan ishlarga baho berilib, zarur tavsiyalar berildi.

Bundan tashqari Bekobodda bolalar futbolini rivojlantirish borasida olib borilayotgan amaliy ishlar doirasida “Metallurg” klubining akademiyasi uchun barpo etilgan yangi yotoqxona, ovqatlanish majmuasi hamda maydon ko‘zdan kechirildi.