O‘z o‘quv-mashg‘ulot yig‘inini Turkiyada olib borayotgan Namanganning “Navbahor” klubi mazkur yig‘in doirasidagi uchinchi nazorat-sinov bahsini 7 fevral kuni kuni Belek shahrida Qozog‘istonning “Jetisu” (Toldiqo‘rg‘on) jamoasiga qarshi o‘tkazdi.

Keskin kurashlar ostida kechgan mazkur o‘yinning birinchi bo‘limida "Navbahor"ning mahoratli yarim himoyachisi Abbos  G‘ulomov hisobni ochdi.

Biroq keyinchalik toldiqo‘rg‘onliklar muvozanatni tiklashga muvaffaq bo‘lishdi.

Birinchi 45 daqiqalik yakunlanishiga sanoqli soniyalar qolganida “Jetisu” a’zolari penalti tepish huquqini qo‘lga kiritishdi. Ammo undan samarali tarzda foydalana olishmadi.

Natijada har ikki jamoa vakillari tanaffusga 1:1 hisobidagi durang bilan chiqib ketishdi.

Ikkinchi bo‘limda har ikki klub tarkibida bir qator o‘zgarishlar yuz berdi. Natijada o‘yin yanada hujumkor ruhda kechdi. Ammo yuzaga kelgan xavfli vaziyatlardan foydalana olmaslik natijasida hisob o‘zgarishsiz qoldi.          

Mazkur bahsda “Navbahor” ustozi Andrey Kanchelskis maydonga quyidagi futbolchilarni tushirdi:

O‘tkir Yusupov, Tohir Shamsitdinov, Igor Golban, Xurshid Muxtorov, Mirzohid G‘ofurov, Islom Rashidxonov, Azimjon Ahmedov, George Andronik, Azizbek Turg‘unboyev, Abbos G‘ulomov, Didar Durdiyev.
Zaxiradan maydonga tushganlar: Dilshod Hamroyev, Obid Jo‘raboyev, G‘iyosjon Komilov, Sardor Telyakov, Ivan Solovyov, Amirbek Jo‘raboyev, Islom Isoqjonov, Maksim Votinov.              

Shu tariqa, Andrey Kanchelskis shogirdlari Turkiyadagi uchinchi nazorat o‘yinida durangga erishishdi.

Eslatib o‘tamiz, namanganliklar oldingi o‘rtoqlik bahslarida  Turkmanistonning “Axal” klubini 1:0, Serbiyaning “Rad” jamoasini 2:1 hisobida mag‘lubiyatga uchratishgandi. E’tiborlisi, Abbos G‘ulomov qatorasiga ikkita o‘yindan buyon gol urmoqda.     

“Navbahor” Turkiyada yana 3ta nazorat-sinov o‘yinlari o‘tkazadi.

“Navbahor” PFK matbuot xizmati.