Ўз ўқув-машғулот йиғинини Туркияда олиб бораётган Наманганнинг “Навбаҳор” клуби мазкур йиғин доирасидаги учинчи назорат-синов баҳсини 7 февраль куни куни Белек шаҳрида Қозоғистоннинг “Жетису” (Толдиқўрғон) жамоасига қарши ўтказди.

Кескин курашлар остида кечган мазкур ўйиннинг биринчи бўлимида "Навбаҳор"нинг маҳоратли ярим ҳимоячиси Аббос  Ғуломов ҳисобни очди.

Бироқ кейинчалик толдиқўрғонликлар мувозанатни тиклашга муваффақ бўлишди.

Биринчи 45 дақиқалик якунланишига саноқли сониялар қолганида “Жетису” аъзолари пенальти тепиш ҳуқуқини қўлга киритишди. Аммо ундан самарали тарзда фойдалана олишмади.

Натижада ҳар икки жамоа вакиллари танаффусга 1:1 ҳисобидаги дуранг билан чиқиб кетишди.

Иккинчи бўлимда ҳар икки клуб таркибида бир қатор ўзгаришлар юз берди. Натижада ўйин янада ҳужумкор руҳда кечди. Аммо юзага келган хавфли вазиятлардан фойдалана олмаслик натижасида ҳисоб ўзгаришсиз қолди.          

Мазкур баҳсда “Навбаҳор” устози Андрей Канчельскис майдонга қуйидаги футболчиларни туширди:

Ўткир Юсупов, Тоҳир Шамситдинов, Игорь Голбан, Хуршид Мухторов, Мирзоҳид Ғофуров, Ислом Рашидхонов, Азимжон Аҳмедов, Георге Андроник, Азизбек Турғунбоев, Аббос Ғуломов, Дидар Дурдиев.
Захирадан майдонга тушганлар: Дилшод Ҳамроев, Обид Жўрабоев, Ғиёсжон Комилов, Сардор Теляков, Иван Соловьёв, Амирбек Жўрабоев, Ислом Исоқжонов, Максим Вотинов.              

Шу тариқа, Андрей Канчельскис шогирдлари Туркиядаги учинчи назорат ўйинида дурангга эришишди.

Эслатиб ўтамиз, наманганликлар олдинги ўртоқлик баҳсларида  Туркманистоннинг “Ахал” клубини 1:0, Сербиянинг “Рад” жамоасини 2:1 ҳисобида мағлубиятга учратишганди. Эътиборлиси, Аббос Ғуломов қаторасига иккита ўйиндан буён гол урмоқда.     

“Навбаҳор” Туркияда яна 3та назорат-синов ўйинлари ўтказади.

“Навбаҳор” ПФК матбуот хизмати.