Italiya A seriyaning 23-turi Milan derbisi bilan yakuniga yetdi. "San-Siro"da bo‘lib o‘tgan "Inter" va "Milan" jamoalari o‘rtasidagi o‘yinda muxlislar juda qiziqarli jangga guvoh bo‘lishdi.

Birinchi bo‘limning so‘nggi daqiqalari "rossoneri" uchun juda omadli keldi. Dastlab Ibrahimovichning bosh bilan bergan uzatmasidan so‘ng Rebich bo‘sh darvozani ishg‘ol qildi. Bu vaziyatda "Inter" posboni Xandanovich xatoga yo‘l qo‘ydi. Taymga qo‘shib berilgan daqiqalarda esa Zlatanning o‘zi bosh bilan "neradzurri" darvozasini zabt etdi.

Konte shogirdlari ikkinchi bo‘limda vaziyatni butunlay o‘zgartirib yuborishdi. Ayniqsa, taym boshida urilgan 2ta tezkor gol "Milan" futbolchilarini shoshirib qo‘ydi.

Uchrashuvning 70-daqiqasida De Vrey o‘z imkoniyatidan samarali foydalanib, "Inter"ni oldinga olib chiqdi. "Milan" bu o‘yinda kamida durangga erishishi mumkin edi. Ammo 89-daqiqada Ibrahimovich bosh bilan yo‘llagan zarbadan so‘ng to‘p ustunga tegib qaytdi...

Qo‘shib berilgan daqiqalarda esa nominal mezbonlar qarshi hujumga o‘tishdi va Lukaku "rossoneri" darvozasiga to‘rtinchi golni urdi.

Shu tariqa, "Inter" o‘z ochkolarini 54taga yetkazib, to‘plar nisbatiga ko‘ra jadvalda 1-o‘ringa ko‘tarilib oldi.

Italiya A seriyasi, 23-tur
Inter – Milan 4:2 (0:2, 4:0)
Gollar: 0:1 – 40 Rebich, 0:2 – 45 Ibragimovich, 1:2 – 51 Brozovich, 2:2 – 53 Vesino, 3:2 – 70 de Vrey, 4:2 – 90+2 Lukaku.
Inter – Padelli, Godin, Shkrinyar, de Vrey, Yang (Biragi, 90), Brozovich, Barella, Kandreva (Mozes, 80), Vesino, Sanches (Eriksen, 72), Lukaku.
Milan – Donnarumma, Teo, Romanyoli, Kyer, Konti, Bennaser, Kessie (Lukas Paketa, 81), Kastilyexo (Rafael Leau, 80), Chalxanoglu, Ibragimovich, Rebich (Bonaventura, 84).
Ogohlantirishlar: Vesino (47), Barella (55), Shkrinyar (55), Kessie (62), Konti (79), Lukaku (90+3).