Sharof Boshbekovning “O‘yin” asari bor, filmini ko‘rgansiz – qimorga kirib qolgan qahramonning ustida tog‘asi uyushtirgan “ish”, esingizda bor, a?! “Gollivud”ning “O‘yin”i ham borki, uning oxirida voqea to‘qilgan bo‘lib chiqadi. Qahramonning hayotiga intriga olib kirish uchun.

O‘zim ishonmaymanu, voqea oxirida bu “Manchester Siti” shayxlarining jamoani uyg‘otish uchun uyushtirgan “ishlari” bo‘lib chiqsaya? Ham sadoqatli futbolchilarni aniqlab olish uchun yaxshi variant:)

Kulmang, yigitlarni “Real” bilan o‘yindan oldin borini tashlashga taklif etish uchun zo‘r g‘oya aslida. Shuncha yil yevrokuboklar uchun kurash olib borgan “shaharliklar” mana shunday og‘ir paytda birlashadilar va qo‘rqinchli raqibni maxv etadilar. “Real”dan o‘tib olsa, ishonavering, chempionlik yo‘lida boshqa motivasiyaning-da keragi yo‘q. Pep oxirigacha shu o‘yinni eslatib olib bora oladi.

Va YECHL kubogi zabt etilgach, apellyasiya javoblari chiqadi, unga ko‘ra “Manchester Siti” UYEFAni yutib chiqadi. Jarima pulini esa shayx Mansur kubok uchun to‘lov deb e’lon qilib qo‘yaveradi. Qalay ssenariy?!

Albatta, ish o‘ylaganimizdan-da chigalroq. Oxirigacha bormay turib bu “o‘yin”ning maqsadini tushuna olmaymiz. Lekin anig‘i shuki, APL ulashayotgan shiddat ikki karra oshganiga kafolat bor:

Yakshanba oqshomida efirga uzatiladigan “Aston Villa” – “Tottenhem”, “Arsenal” – “Nyukasl” va dushanba tunining bezagi “Chelsi” – "MYU" bellashuvlari darajasi o‘sha “bo‘sh joy” hisobiga dahshatli ko‘rinish olmoqda.

“Manchester Siti” atrofidagi gap-so‘zlar nafaqat APLning, balki boshqa diyorlarning top klublarini-da uyg‘otib yubordi. Gvardiola va yulduz o‘yinchilarning xaridi masalasi ko‘tarilyapti hozirdan. Sadoqatli yigitlar bormi, ko‘ramiz, deydiyu...

Shunday paytda UYEFA shu qarorini aynan hozir chiqargani ham yaxshi bo‘ldimi deb qo‘yadi odam...

Xayrulla HAMIDOV.