Шароф Бошбековнинг “Ўйин” асари бор, фильмини кўргансиз – қиморга кириб қолган қаҳрамоннинг устида тоғаси уюштирган “иш”, эсингизда бор, а?! “Голливуд”нинг “Ўйин”и ҳам борки, унинг охирида воқеа тўқилган бўлиб чиқади. Қаҳрамоннинг ҳаётига интрига олиб кириш учун.

Ўзим ишонмайману, воқеа охирида бу “Манчестер Сити” шайхларининг жамоани уйғотиш учун уюштирган “ишлари” бўлиб чиқсая? Ҳам садоқатли футболчиларни аниқлаб олиш учун яхши вариант:)

Кулманг, йигитларни “Реал” билан ўйиндан олдин борини ташлашга таклиф этиш учун зўр ғоя аслида. Шунча йил еврокубоклар учун кураш олиб борган “шаҳарликлар” мана шундай оғир пайтда бирлашадилар ва қўрқинчли рақибни махв этадилар. “Реал”дан ўтиб олса, ишонаверинг, чемпионлик йўлида бошқа мотивациянинг-да кераги йўқ. Пеп охиригача шу ўйинни эслатиб олиб бора олади.

Ва ЕЧЛ кубоги забт этилгач, апелляция жавоблари чиқади, унга кўра “Манчестер Сити” УЕФАни ютиб чиқади. Жарима пулини эса шайх Мансур кубок учун тўлов деб эълон қилиб қўяверади. Қалай сценарий?!

Албатта, иш ўйлаганимиздан-да чигалроқ. Охиригача бормай туриб бу “ўйин”нинг мақсадини тушуна олмаймиз. Лекин аниғи шуки, АПЛ улашаётган шиддат икки карра ошганига кафолат бор:

Якшанба оқшомида эфирга узатиладиган “Астон Вилла” – “Тоттенҳэм”, “Арсенал” – “Ньюкасл” ва душанба тунининг безаги “Челси” – "МЮ" беллашувлари даражаси ўша “бўш жой” ҳисобига даҳшатли кўриниш олмоқда.

“Манчестер Сити” атрофидаги гап-сўзлар нафақат АПЛнинг, балки бошқа диёрларнинг топ клубларини-да уйғотиб юборди. Гвардиола ва юлдуз ўйинчиларнинг хариди масаласи кўтариляпти ҳозирдан. Садоқатли йигитлар борми, кўрамиз, дейдию...

Шундай пайтда УЕФА шу қарорини айнан ҳозир чиқаргани ҳам яхши бўлдими деб қўяди одам...

Хайрулла ҲАМИДОВ.