Chempionlar ligasida hammasi aralashib ketdi. O‘ylaymanki, aynan shunday natijalarni hech kim kutmagan.

Mavsumning eng yorqin klubi, amaldagi chempion, yutqazmay kelayotgan "Liverpul" hamma unutib qo‘ygan "Atletiko"ga mag‘lub bo‘ldi.

Har yilgi favorit "PSJ" o‘z yulduzlari bilan Dortmunddan bosh egib qaytdi.

Kecha bu tendensiya davom etdi. "Tottenxem" murabbiylikka Chempionlar ligasining ikki karra g‘olibini olib kelgani bilan turnirda favorit bo‘lib qolmasligi isbotlandi. Mourinyoni 32 yashar vunderkind murabbiy urib qo‘ydi. "Leypsig" nima qilib yuribdi bu bosqichda deganlarga javob.

Va nihoyat "Atalanta". ATALANTA! Bundan katta harflarda yozib bo‘lmas ekan. Bu klub ishonmaganlarni uyaltirdi. Ular qatorida men ham borman, tan olaman. "Valensiya" garchi hozirda grand hisoblanmasa ham "Atalanta" bilan solishtirganda CHLning eski bo‘rilaridan. Ammo Akela ovda adashdi.

Xulosa shuki, bu turnirda favoritlar qolmadi.
"Yuventus" endi "Lion" bilan qo‘l uchida salomlashmaydi.
"Barselona" ham Napoliga sal o‘ylashib boradi.

Postim sarlavhasi faqatgina ushbu hafta yutqazgan favoritlarga tegishli emas. G‘alaba qozonganlar ham o‘zini chorak final o‘yinida “the champiooooons” deb madhiyani mag‘rur kuylab turganini tasavvur qilishga shoshilmasligi kerak. Javob o‘yinida hammasi o‘zgarib ketishi mumkin. Ishonmasangiz "Liverpul"dan so‘rang. Ularda shior bor “never give up”. Ya’ni, hech qachon taslim bo‘lma!

Davron Fayziyev.