Чемпионлар лигасида ҳаммаси аралашиб кетди. Ўйлайманки, айнан шундай натижаларни ҳеч ким кутмаган.

Мавсумнинг энг ёрқин клуби, амалдаги чемпион, ютқазмай келаётган "Ливерпуль" ҳамма унутиб қўйган "Атлетико"га мағлуб бўлди.

Ҳар йилги фаворит "ПСЖ" ўз юлдузлари билан Дортмунддан бош эгиб қайтди.

Кеча бу тенденция давом этди. "Тоттенхэм" мураббийликка Чемпионлар лигасининг икки карра ғолибини олиб келгани билан турнирда фаворит бўлиб қолмаслиги исботланди. Моуриньони 32 яшар вундеркинд мураббий уриб қўйди. "Лейпциг" нима қилиб юрибди бу босқичда деганларга жавоб.

Ва ниҳоят "Аталанта". АТАЛАНТА! Бундан катта ҳарфларда ёзиб бўлмас экан. Бу клуб ишонмаганларни уялтирди. Улар қаторида мен ҳам борман, тан оламан. "Валенсия" гарчи ҳозирда гранд ҳисобланмаса ҳам "Аталанта" билан солиштирганда ЧЛнинг эски бўриларидан. Аммо Акела овда адашди.

Хулоса шуки, бу турнирда фаворитлар қолмади.
"Ювентус" энди "Лион" билан қўл учида саломлашмайди.
"Барселона" ҳам Наполига сал ўйлашиб боради.

Постим сарлавҳаси фақатгина ушбу ҳафта ютқазган фаворитларга тегишли эмас. Ғалаба қозонганлар ҳам ўзини чорак финал ўйинида “the champiooooons” деб мадҳияни мағрур куйлаб турганини тасаввур қилишга шошилмаслиги керак. Жавоб ўйинида ҳаммаси ўзгариб кетиши мумкин. Ишонмасангиз "Ливерпуль"дан сўранг. Уларда шиор бор “never give up”. Яъни, ҳеч қачон таслим бўлма!

Даврон Файзиев.