«Barselona» klubi Ispaniya chempionatining 25-turidan o‘rin olgan «Eybar»ga qarshi o‘yinda yirik hisobda (5:0) g‘alaba qozondi. Kataloniyaliklar sardori Lionel Messi bugungi o‘yinda 4ta gol urishga muvaffaq bo‘ldi.
Argentinalik futbolchi uchun bu Ispaniya La ligasi doirasidagi beshinchi "poker" bo‘ldi. Avvalroq u 2017/18, 2012/13 va 2011/12 (ikki marta) mavsumlarda "poker"ni rasmiylashtirgan edi.
Jurnalist Pedro Martin tarqatgan xabarga ko‘ra, Messi «Barselona» futbolchilari orasida bitta o‘yinda 4ta gol urish bo‘yicha birinchi o‘ringa ko‘tarilib oldi. Kataloniyaliklarning sobiq hujumchisi Sesar Rodriges faoliyati davomida 4 marta "poker"ga erishgan.
Ispaniya chempionatlari tarixida "poker"lar bo‘yicha «Real» klubi sobiq hujumchisi Krishtianu Ronaldu (7) va «Atletik» forvardi Telmo Sarra (8) Messini ortda qoldirishmoqda.
Lionel Messining faoliyatidagi "xet-trik"lar soni esa 54taga yetdi. Ularning 36tasiga hujumchi Ispaniya chempionatida erishgan. La ligadagi "xet-trik"lar bo‘yicha ikkinchi ko‘rsatkich Krishtianu Ronalduga tegishli (34ta).
