“Bryugge”ga qarshi uchrashuv MYUning bugungi o‘yini oldidan tahlil qilish uchun hech narsa bermaydi. Katta rotasiya sabab aniq holatni baholashda yanglishib qolishimiz ehtimoli oshadi. Biroq, “Chelsi”ga qarshi o‘yin haqiqatdan o‘rganishga arziydi.

London jamoasi muxlislari albatta o‘sha o‘yindagi VAR bilan bog‘liq bahsli holatlarnigina eslashsa kerak. Ammo, ayni paytda Sulsherning tarkibi haqida ijobiy fikrlarni neytral muxlislar ham e’tirof etishsa kerak. Marsyal sport formasini tobora yaxshilab bormoqda. Tezlik, dribling, zarba kuchi va aniqligi, vaziyatni to‘g‘ri baholay olish – bir hujumchiga nima kerak bo‘lsa hammasi bor unda, aslida. Brunu Fernandesh o‘yinga tez kirishib ketdi. (Masalan, men biroz vaqt kerak bo‘ladi, deb o‘ylagandim). Yo‘q! Portugaliyalik futbolchi maydonda allaqachon erkin nafas olmoqda. Uning “Stemford Bridj”dagi assistidan tashqari hech qanday alohida harakatlari ham bunday deyishga imkon bermoqda. Aoron Van-Bissaka himoyadagi ishlaridan ortib, hujumga ham ko‘mak berishni boshlab yubordi. Fred esa hatto bilmay qolipman ikki oydan buyon klubning eng yaxshi futbolchisi sifatida e’tirof etilayotgan ekan!

UEFAning “Manchester Siti” ishidan so‘ng CHL yo‘llanmasini taqdim etuvchi 5 o‘rin haqida ko‘p aytildi. Amalda MYU to‘rtlik uchun ham kurashishi mumkin. Har holda Sulsher shogirdlari raqobatchilaridan biri “Chelsi”ni yengib bu harakatni boshlab yubordi.
Xullas, bugun o‘tadigan 19-o‘rinda borayotgan “Uotford”ga qarshi o‘yin muammo bo‘lmasligi lozim. Ammo, gap shundaki mavsumdagi birinchi o‘yinda shu kollektiv g‘alaba (2:0) qozongani ham fakt. Bu o‘yinimizga faqat keskinlik taqdim etadi, menimcha.

Demak, futbol muxlislarini “Manchester Yunayted” – “Uotford” uchrashuvini tomosha qilishga chorlab qolaman. Manzil o‘sha-o‘sha!