Superliga 1-turi doirasida "Navbahor" Toshkentda “Paxtakor” mehmoni bo‘ladi.

Superliga (oliy liga)ning muntazam ishtirokchisi bo‘lgan mazkur klublarning o‘zaro uchrashuvlari tarixiga nazar tashlaydigan bo‘lsak, jamoalar hozirgacha 58 marta o‘zaro ro‘baro‘ kelishgan. O‘zaro o‘yinlar bo‘yicha ustunlik poytaxtliklar tarafida. O‘tkazilgan bahslarning 36tasida “sherlar” zafar quchishgan bo‘lsa, 13ta o‘yinda “lochinlar” g‘alaba qozonishgan, 9 ta uchrashuvda esa durang qayd etilgan. “Paxtakor” “Navbahor” darvozasiga 98 ta to‘p kiritib, o‘z darvozasidan 45 ta to‘p o‘tkazib yuborgan.  

Ushbu jamoalarning o‘zaro o‘yinlari tarixida qayd etilgan eng yirik hisob - 7:0. Ushbu hisob 2009 yili Toshkentda bo‘lib o‘tgan uchrashuvda qayd etilib, unda “Paxtakor” zafar quchgandi.

Ayni paytgacha Toshkentda bo‘lib o‘tgan uchrashuvlarning 24tasida “sherlar” g‘alaba qozonishgan bo‘lsa, 1ta o‘yinda “lochinlar” zafar quchishgan, 4ta bahsda esa durang natija qayd etilgan.

O‘z o‘pnida shuni ta’kidlash joizki, “Navbahor” Andrey Kanchelskis murabbiyligida Toshkentda “Paxtakor”ga yutqazmagan.

Poytaxtimizda 2018 yili o‘tkazilgan o‘yinda 0:0, 2019 yili bo‘lib o‘tgan bahsda esa 2:2 hisobidagi durang qayd etilgan.

Bu safar yangi mavsumning ochilish uchrashuvida mazkur jamoalar o‘zaro to‘qnash kelishmoqda.

Eslatib o‘tamiz, “Paxtakor” – “Navbahor” o‘yini 27 fevral, payshanba kuni “Paxtakor” stadionida soat 16:00da start oladi.

“Navbahor” PFK matbuot xizmati.