Bektemir Meliqo‘ziyev olimpiadaga bormaydigan bo‘ldi
Tokio olimpiadasiga saralash maqomini o‘taydigan, Iordaniya poytaxti Amman shahrida bo‘lib o‘tadigan boks bo‘yicha Osiyo-Okeaniya mintaqalari saralash musobaqasida Bektemir Meliqo‘ziyev ishtirok etmaydigan bo‘ldi. Bu haqda bokschining vakillari GoSport.uz internet-nashriga ma’lum qildi.
Ma’lum bo‘lishicha, Bektemir Meliqo‘ziyevga doping sabab qo‘yilgan taqiq 28 fevral kuni bekor bo‘lishi kerak bo‘lgan. Ammo terma jamoa murabbiylar shtabi sportchiga taqiq yechilmaganini aytgan va musobaqada ishtirok eta olmasligini bildirishgan. Manba bu borada rasmiy xat yoki tegishli hujjatning nusxasi sportchida yo‘qligini ma’lum qilishdi.
Eslatib o‘tamiz, Bektemir Meliqo‘ziyev musobaqada -75 kg vaznda ishtirok etishi lozim edi. Endilikda uning o‘rnini Fanat Qahramonov egallaydi. Oldinroq, Bektemir birinchi saralashda ishtirok etmasligi, uning o‘rni bo‘sh turishi va may oyida Fransiyada o‘tadigan saralash musobaqasida Meliqo‘ziyev ishtirok etishi xabar qilingandi. Keyinroq, saralash musobaqasi ortga surilgan va Bektemir Meliqo‘ziyev birinchi saralashdayoq ishtirok etish imkoniyatiga ega bo‘lgani ma’lum qilingandi.
