O‘zbekistonda futbolni 2030 yilgacha yangi bosqichga olib chiqish konsepsiyasini 2019–2020 yillarda amalga oshirish bo‘yicha “Yo‘l xaritasi”da Futbolda sharhlovchilik sohasini kuchaytirish, ushbu yo‘nalishda iste’dodli kadrlarni tayyorlash, malaka oshirish tizimini yo‘lga qo‘yish masalalariga ham alohida e’tibor qaratib o‘tilgan.

Ushbu belgilangan vazifalar ijrosini ta’minlash maqsadida kuni kecha O‘zbekiston jurnalistika va ommaviy kommunikasiyalar universitetida taniqli sport sharhlovchilari Xayrulla Hamidov, Davron Fayziyev va Diyor Imomxo‘jayev ishtirokida mahorat darsi bo‘lib o‘tdi. Qiziqarli va ochiq muloqot tarzida o‘tgan uchrashuvda dasturda ko‘zda tutilgan sport jurnalistikasi, xususan, futbol sharhlovchiligi sohasini rivojlantirish masalalari muhokama etildi. Unda jurnalistika sohasiga endigina kirib kelayotgan, sharhlovchilik faoliyatiga qiziqishi bor yoshlar ishtirok etishdi va soha yuzasidan o‘zlarini qiziqtirgan savollariga javob olishdi.

Dastlab, sharhlovchilarning har biri so‘z olib, bo‘lg‘usi jurnalistlarga sharhlovchi faoliyatining o‘ziga xos jihatlari xususida gapirib o‘tishdi. So‘ngra, mahorat darsi savol-javob tarzida davom etdi. Uchrashuv so‘ngida bu kabi o‘quv-mashg‘ulot darslarini muntazam ravishda o‘tkazib turish bo‘yicha kelishib olindi.