Rossiya chempionatining 22-turi doirasida markaziy o‘yin bo‘lib o‘tdi. «Rostov» o‘z uyida «Lokomotiv»ni qabul qilib, imkoniyatni boy berdi.

Uchrashuvni asosiy tarkibda boshlagan Eldor Shomurodov 16-daqiqada gol urish uchun ajoyib imkoniyatga ega bo‘ldi. Yeryomenkoning uzatmasidan keyin hamyurtimiz darvoza chizig‘i oldidan to‘pni yerga tushirmasdan darvoza tomon tepdi. "Temiryo‘lchilar" posboni Gilyerme to‘pni qaytardi. Oradan 5 daqiqa o‘tib "Loko" darvozaboni Eldorning 17 metrdan yo‘llagan zarbasini bartaraf etdi.

Moskvaliklar kutilmaganda hisobni ochishdi. Krixovyak 30 metrlardan allambalo trayektoriya bilan zarba yo‘lladi. To‘p esa to‘singa tegib qaytdiyu, darvozabonning boshiga tegib, to‘rga borib tushdi.

"Lokomotiv" hisobni ochib olgach, "Rostov" ishtiyoq bilan oldinga tashlandi, ammo keyingi mezbonlar keyingi 8 daqiqa ichida qarshi hujumda yana 2ta gol o‘tkazib yuborishdi.

Ikkinchi bo‘lim o‘rtalarida hakam moskvaliklar darvoza tomon penalti belgiladi. Popov hisobda farqni bittaga qisqartirdi. Qolgan daqiqalarda "Loko" ishonchli himoyalanib, g‘alabani ushlab qoldi.

Ushbu g‘alabadan keyin "Lokomotiv" 41 ochko bilan 2-o‘ringa ko‘tarilgan bo‘lsa, "Rostov" 4-o‘ringa tushib qoldi.

Rossiya premyer-ligasi, 22-tur
Rostov – Lokomotiv 1:3 (0:3, 1:0)
Gollar: 0:1 – 34, avtogol Pesyakov, 0:2 – 38 Jemaletdinov, 0:3 – 42 Krixovyak, 1:3 – 64, penalti Popov.
Rostov – Pesyakov, Xadjikadunich, Kozlov, Osipenko, Chernov, Bayramyan (Saplinov, 86), Normann, Zaynutdinov (Dolgov, 87), Yeremenko, Popov, Shomurodov.
Lokomotiv – Gilyerme, Ignatyev, Kverkveliya, Xevedes, Ribus, Miranchuk, Krixovyak, Joau Mariu (Magkeev, 73), Barinov, Jemaletdinov (Idovu, 82), Eder.
Ogohlantirishlar: Xajikadunich (54), Normann (86), Barinov (90).