Jismoniy tayyorgarlik bo‘yicha Yevropaning yetakchi mutaxassislari koronavirus tufayli to‘xtab qolgan milliy chempionatlar qayta boshlanganida futbolchilar jismoniy jihatdan jiddiy muammolarga duch kelishidan xavotirda.

«Jismoniy tayyorgarlik darajasi ancha pasayadi. Bu esa jiddiy muammo. Katta tanaffusdan keyin sportchilar a’lo darajadagi formada bo‘ladi, deb o‘ylash — shunchaki utopiya. Har bir professional aniq bir sana, aniq mucoabaqa yoki katta o‘yinga tayyorlanish ulkan motivasiya ekanini biladi. Ammo hozir hech narsa aniq emas», — dedi Ispaniya terma jamoasining jismoniy tayyorgarlik bo‘yicha sobiq murabbiyi Xesus Paredes.

O‘z vaqtida "Real" va "Uotford"da ishlagan Alberto Xiraldes yuqoridagi hamkasbining fikriga qo‘shiladi.

«Barcha klublar har bir o‘yinchining jismoniy holati pasayib borayotganini ko‘radi. Ba’zi klublar boshqalarga nisbatan qiyin vaziyatdan yaxshiroq chiqib ketishadi. Bunda jismoniy tayyorgarlik bo‘yicha murabbiylarning ishi muhim ahamiyatga ega bo‘ladi.

Karantinda bo‘lish barcha ta’sir ko‘rsatadi. Barcha o‘yinchilar doimiy mashg‘ulot darajasini ushlab turishi juda muhim. Professional sportchining gavdasi optimal darajadagi yuklamani ko‘tarishi kerak. Aks holda avvalgi mehnatlar orqali erishilgan natijalarni osongina boy berish mumkin».