«Barselona» klubi sobiq bosh murabbiyi Xavi Angliya Premyer-ligasida faoliyatini davom ettirishi mumkin. Independent nashri xabariga ko‘ra, ispaniyalik mutaxassis «Chelsi» bosh murabbiyligiga asosiy nomzodlardan biri bo‘lib turibdi.

London klubi Liam Rosenyor bilan xayrlashishga qaror qilgach, yangi murabbiy qidirishni boshlagan. Manbaning ta’kidlashicha, «ko‘klar» rahbariyatiga Xavining o‘yin uslubi ma’qul kelmoqda. Bu uslub jamoaning Enso Mareska davridagi futbol falsafasiga yaqin ekani aytilmoqda.

Ma’lumot uchun, Xavi 2024 yilning yozida «Barselona»ni tark etganidan buyon ishsiz yuribdi.

Hozirda «Chelsi» ichki chempionatda muvaffaqiyatsiz ishtirok etmoqda. Jamoa APLning 35 turidan so‘ng 48 ochko jamg‘arib, turnir jadvalining 9-pog‘onasini egallab turibdi va Chempionlar ligasi hududidan tashqarida qolgan.