«Manchester Siti» himoyachisi Yoshko Gvardiol faoliyatini Ispaniyada davom ettirishi mumkin. Sportske Novosti nashrining ma’lumotlariga ko‘ra, xorvatiyalik futbolchining transferiga «Real» Madrid klubi qiziqish bildirmoqda.

Madrid klubi o‘yinchini shu yozda sotib olish variantini ko‘rib chiqmoqda. Qayd etish joizki, Yoshko Gvardiol shu yilning yanvar oyida bo‘lib o‘tgan «Chelsi»ga qarshi o‘yinda (1:1) o‘ng oyoq boldir suyagini sindirib olgan edi. Xorvatiyalik futbolchi operasiya qilindi va yaqin oradagina individual dastur asosida mashg‘ulotlarga qaytdi.

Gvardiol 2023 yilda «RB Leypsig»dan «Manchester Siti»ga 90 million yevro evaziga o‘tgan edi. Uning amaldagi shartnomasi 2028 yilning 30 iyuniga qadar mo‘ljallangan. Joriy mavsumda xorvatiyalik himoyachi «shaharliklar» safida barcha musobaqalarda 23 ta o‘yinda maydonga tushib, ikkita gol urdi va beshta golli uzatmani amalga oshirdi.