Ma’lumki, bugungi kunda butun dunyo koronavirus bilan kurashmoqda. Ushbu xavfli virusning tarqalishi tufayli ko‘plab global voqealar va tadbirlar bekor qilinmoqda yoki qoldirildi. Shubhasiz, sport sohasi va u bilan bog‘liq barcha narsalar ham mazkur epidemiya sabab xavf ostida qolgan edi. Xususan, bu yil 4 yillikning asosiy sport tadbiri bo‘lmish Olimpiya o‘yinlari Tokio shahrida o‘tkazilishi rejalashtirilgan. Biroq koronavirus yoxud olimlar tomonidan “pandemiya” deb nomlangan xavfli virus musobaqaning o‘tkazilishiga ta’sir qilmoqda. Xalqaro Olimpiya qo‘mitasi Olimpiadani bekor qilish yoki kechiktirish bo‘yicha muhokamalarga nuqta qo‘yib, musobaqaning o‘z vaqtida o‘tishi bo‘yicha rasmiy bayonot berdi. Shuningdek, XOQ barcha atletlarni Olimpiya o‘yinlariga tayyorlanishga chaqirmoqda.

O‘zbekiston hukumati tomonidan Respublika aholisini, shuningdek, sportchilarni epidemiyadan saqlash bo‘yicha zarur chora-tadbirlar ko‘rilmoqda. XOQning joriyning yil 12 mart kuni bergan tavsiyasiga ko‘ra atletlarni Olimpiya o‘yinlariga tayyorlash davom etadi. Shu bilan birga, terma jamoa a’zolarining xalqaro sport musobaqalari va xorijiy o‘quv-mashg‘ulot yig‘inlaridagi ishtiroki, musobaqalar va boshqa sport tadbirlaridagi ishtiroki vaqtincha to‘xtatildi.

Yuqoridagi vaziyatdan kelib chiqqan holda sportchilarimizning tayyorgarligini maksimal darajada kuchaytirish maqsadida yig‘inlar yurtimiz hududida joylashgan sport bazalarida davom etmoqda.

Hozirgi kunda akademik eshkak eshish, bo‘yicha terma jamoamiz Tuyabo‘g‘iz suv omborida tayyorgarlik olib bormoqda. Ertadan mazkur suv havzasida baydarka va kanoechilarimiz ham yangi mashg‘ulotlarga kirishadilar.

Dzyudo, taekvondo, para-taekvondo kabi terma jamoalarimiz tog‘li hududlarda yig‘in boshlagan bo‘lsa, sport va badiiy gimnastikachilarimiz poytaxtimizdagi bazasida o‘quv-mashg‘ulot yig‘inini o‘tkazishmoqda. Ta’kidlash joiz, barcha mashg‘ulot maydonlari xavfsiz zonada olib boriladi. Har bir sportchi federasiya rahbarlari va tibbiy xodimlarning qat’iy nazoratida bo‘lib, kuniga 3 mahal qat’iy belgilangan tekshiruvda bo‘lishadi. Shuningdek, barcha sport inshootlari zarur dezinfeksiyalovchi vositalar bilan ta’minlangan. Sportchilarga gigiyena bo‘yicha barcha ma’lumotlar taqdim qilingan. Shuni alohida ta’kidlash kerakki, barcha mashg‘ulotlar karantin rejimida o‘tkaziladi. Begona odamlarga kirish man etilib, barcha zarur profilaktika choralari ko‘riladi.