Braziliyalik afsonaviy Ronaldinyo 6-mart sanasidan beri Paragvay qamoqhonalaridan birida saqlanayotganidan xabaringiz bor. Uni hujjatlarni soxtalashtirish gumon qilishgani bois turmada ushlab turishibdi.
Shunga qaramay, so‘nggi xabarlarga qaraganda, futbolchi o‘z vaqtini bekorga sarflamayapti. Qahramonimiz ozodlikdan vaqtincha mahrum etilganiga qaramay, havas qilsa arzigulik hayot kechirmoqda. Endilikda Roni istaganicha to‘p tepmoqda.
Zamonaviy futbolchilar karantin sababli uydan ko‘chaga chiqa olmayotgan bir paytda, Ronaldinyo o‘zi istamagan tarzda «karantin»da o‘tiribdi. Shu jumladan Ronaldinyo ham 6-martdan beri Paragvay politsiyasi tomonidan garovda ushlab turilmoqda.
Futbolchi va uning akasi Paragvaydan Braziliyaga uchib ketish uchun aeroportga tashrif buyurganidagina ularning hujjatlari soxta ekanligini ma’lum bo‘lgan. Shunday bo‘lsa-da, sobiq futbolchining agenti mijozi hech narsadan bexabar ekanligini takrorlashdan charchamayapti. Aslida bu hujjatlarni mahalliy biznesmen Ronaldinyoga sovg‘a tariqasida taqdim etgan bo‘lsa-da, Paragvay hukumati Ronini turmada vaqtincha ushlab turibdi.
Qariyb ikki haftadan beri futbolchi og‘ir sharoitdagi jazo kalonasida hayot kechirmoqda. So‘nggi ma’lumotlarga qaraganda, Roni akasi bilan qamoqhonadagi eng yaxshi kameraga joylashtirilgan. Qamoqhona mudirining aytishicha, aka-ukalar joylashgan kamera istalgan oteldan ko‘ra ko‘proq qulayliklarga ega ekan. Shuningdek, ular joylashgan blokda pora bilan qo‘lga tushgan Paragvay futbol federasiyasining sobiq rahbari ham saqlanmoqda.
Ronaldinyoning o‘zi tezroq turmadan chiqish uchun Paragvay sudidan uni garov evaziga qo‘yib yuborishlarini iltmos qilgan. Futbolchi o‘z iltimosini amalga oshirish maqsadida 1,6 million dollar taklif qilganiga qaramay, Paragvay hokimiyati futbolchining iltimosini rad etdi. Paragvay sudi aka-ukalarning Braziliyaga qochib ketishi mumkinligi sababli ularni hozircha maxsus kamerada ushlab turishni afzal ko‘rgan.
Hozircha Ronaldinyo va Roberto turmada yana qancha vaqt saqlanishi noma’lumligicha qolmoqda. Ma’lumotlarga qaraganda, aka-ukalar tergov to‘liq yakunlanmaguniga qadar Paragvaydan chiqib ketish huquqiga ega emas. Mahalliy nashrlarning bergan xabarlariga ko‘ra, tergov kamida 6 oyga cho‘zilishi mumkin.
Futbolchidan qamoqhonadagi mahbuslar birga to‘p surishni iltimos qilishgan, biroq Roni o‘ziga mos keluvchi oyoq kiyim yo‘qligi bois buni rad etgan. Shunga qaramay, so‘nggi kunlarda sobiq JCH g‘olibining qora oyoq kiyimda mini-futbol maydonida to‘p tepayotgani aks etgan video ijtimoiy tarmoqlarda keng tarqaldi.
Ronaldinyoning do‘sti Fernando Lugoning aytishicha, futbolchi uchun qamoqhonada barcha sharoitlar yaratilgan. U vaziyatdan norozi bo‘layotganiga qaramay, uning hayoti boshqa maxbuslarnikidan keskin farq qilayotgan ekan.
Qamoqhona noziri Vlas Vera bergan intervyuga ko‘ra, futbolchining kundan-kun kayfiyati yaxshilanib bormoqda.
“Ko‘rinib turibdiki, uning kayfiyati juda yaxshi. Men uni telekran orqali mana shunday qunvoq qiyofada ko‘rishga o‘rganib qolganman. U qamoqhonadagi boshqa maxbuslar bilan so‘zlashganini va ular bilan ochiq havoda aylanib yurganini ko‘rdim”.
Bugungi kunda Roni tushib qolgan vaziyat barcha o‘ylaganichalik og‘ir emas. Futbolchi har kuni o‘zi istagan taomni buyurtirishi, istagan vaqtda kameradan chiqish huquqiga ega. Shunga qaramay, braziliyalik tezroq barchasiga chek qo‘yishni istamoqda. Voqealar rivojini kuzatishda davom etamiz.
