Bugun 22 mart. Futbolchilar, murabbiylar va klublarga aloqasi yo‘q sana. Lekin umumfutbol uchun muhim kun.

1888 yili 22 mart kuni London shahrida Angliyaning bir qator klublari rahbarlari to‘planib, barcha jamoalarni birlashtirib turadigan Liga tuzishga kelishib olishgan. Ya’nikim, Angliya Futbol Ligasi g‘oyasi tasdiqlangan kun.

O‘sha paytdagi tartibsizlikdan bezor bo‘lgan saviyali shaxslar klublar faoliyatiga professional yondoshish uchun ham shu ishga qo‘l urishgan va maqsadlariga yetishishgan. Ayni paytgacha eng qadimgi Liga hisoblanadigan tashkilot barchaga o‘rnak bo‘lib kelmoqda.

AFLning tasarrufiga Chempionship, 1 va 2-liga turnirlari kiradi. 1992 yilga qadar Angliya birinchi divizioni ham kirardi. Lekin turnir Premyer-liga maqomini olgach, alohida tashkilotga aylandi.

1995 yildan ligada 72 klub mavjud. Yuqorida aytganimizdek, ular uchta divizionda qatnashadilar. Uelsning bir qismi ham bu Ligaga a’zo.

AFL egidasi ostida ikki kubok turniri o‘tkaziladi – Angliya futbol ligasi kubogi (Carabao Cup) va Angliya futbol ligasi trofeyi (Leasing.com Trophy).

Ayni shu kunlarda bu qadimiy tashkilotga asos solinganini eslashimizning o‘ziga xos mazmuni bor. Oxirgi marta AFL Angliya chempionini aniqlagan davrlar  “Liverpul” o‘ynab kulib Angliya chemrioni bo‘lar edi. Va hatto Liganing turniri bo‘lmish AFL kubogida ham 8 bor g‘olib kelib, rekord qayd etgan.

AFL premyerliga ishlariga aralashmay qo‘yganiga ham 30 yil bo‘lyapti. Liverpulliklar ushbu tashkilot egidasi ostida Angliya chempionligi aniqlansagina, g‘oliblikni osonlikcha qo‘lga kiritishar ekan, bilib oldik. Premyerliga ajralib chiqqach, keyingi chempionlikka endi-endi yetib kelmoqda. Ha, dahshatli farq bilan-da yetib kelganicha yo‘q hali. O‘rtaga koronavirus balosi tiqilib kirdi.

Xullas, futbol vatani sanalmish Angliyada rasmiy bahslar asosan Liverpul shahrida boshlanganini hisobga olsak, uning bag‘rida ham asosan shu shahar futbolchilari o‘zlarini yaxshi his etishgan va yangi turnirda o‘ttiz yil deganda g‘olib bo‘laman deganda nimalar sodir bo‘layotganini ko‘ryapmiz. Balki Premyer-liga yana qadimgi Liga egidasi ostiga qaytar, a? Bunga Liverpulning qo‘shnisi – Manchester shahri ko‘nmasa kerak.

Xayrulla Hamidov.