Superliganing yangi mavsumi starti «Buxoro» uchun omadsiz kelmoqda. Jamoa hozircha turnir jadvalining so‘nggi o‘rinlarida bormoqda. Yaqinda klub matbuot xizmati «Buxoro» bosh direktori Jamshid Botirov bilan suhbat uyushtirdi. Quyida mazkur intervyu bilan tanishishingiz mumkin.
- Jamshid Mehmonovich, klub rahbari etib tayinlanishingiz qanday amalga oshdi?
- Avvalambor, barchani kirib kelayotgan Navro‘z bayrami bilan tabriklayman. Futbol klubi rahbarligiga kelishimga viloyat hokimligidagi futbolga mas’ul insonlarning taklifi sabab bo‘ldi. Ular viloyatimiz bosh jamoasini tubdan yangilash, mahalliy yoshlarga ko‘proq imkoniyat berish kerakligi, meni yoshlar bilan ishlash hadisini olgan mutaxassis sifatida bilishlarini aytib, ushbu lavozimga aynan meni tavsiya qilishdi. Albatta, viloyat futboliga befarq emasligim, qolaversa, klub tizimidagi «Buxoro» futbol maktabi rahbari va murabbiyi sifatida bir qancha tarbiyalanuvchilarimizni viloyatimiz bosh jamoasi, o‘rinbosarlar tarkibiga yetkazib berganligimiz inobatga olindi. Jamoa tarkibini deyarli to‘liq bilaman. Bundan tashqari, rahbarlar tashabbusi bilan «Buxoro»ni yaqin kelajakda to‘liq o‘zimizning yosh tarbiyalanuvchilarimiz hisobiga shakllantirish rejasi menga ma’qul kelganligi sabab ushbu lavozimda ishlashga rozilik berdim.
- O‘z vaqtida futbolchi va murabbiy sifatida faoliyat olib borgansiz. Shu haqda ham gapirsangiz.
- Albatta, katta futboldagi qadamlarimni O‘zbekiston 1-ligasida ishtirok etgan Buxoroning «Lokomotiv» va «Sitora» jamoalarida boshlaganman. Murabbiylik faoliyatimni esa mamlakatimizning mashhur, birinchilardan bo‘lib tashkil etilgan «Mash’al» klubiga qarashli futbol akademiyasida boshlaganman. 2011 yili Buxoro viloyati hokimining taklifiga binoan, «Buxoro» klubiga qarashli futbol maktabiga rahbar etib tayinlanganman.
- «Buxoro» jamoasi oldiga rahbariyat tomonidan qanday vazifa qo‘yilgan?
- «Buxoro» - O‘zbekistonda o‘z nomi va obro‘siga ega klub. Albatta, hozir tarkibimiz 70 foizga yangilanganligini inobatga olgan holda, zimmamizga Superligada munosib qatnashish, shuningdek, kelajakda mamlakat chempionatida raqobatbardosh jamoa shakllantirish vazifasi yuklatilgan. Ayni paytdagi moliyaviy imkoniyatimizni inobatga olgan holda, tarkibimizga 4 nafar legioner, mamlakatimizning turli jamoalarida faoliyat yuritgan 8 nafar o‘zbekistonlik futbolchilar jalb etildi. Bundan tashqari, ixtiyorimizda 14 nafar mahalliy yoshlar bor. U-18 va U-21 jamoalarimizda Buxoro futbol maktabi tarbiyalanuvchilari to‘p surishmoqda.
- «Buxoro»ni oldinda nimalar kutmoqda? Reja va maqsadlar xususida ma’lumot bersangiz.
- Kelajakda jamoa tarkibida to‘liq buxorolik yoshlar ishtirokini ta’minlash va turli yoshdagi termalarimizga mahalliy iqtidorli yoshlarni yetkazib berishni maqsad qilganmiz.
- Futbol birinchi navbatda muxlislar uchun o‘ynaladi. Jamoa ishqibozlariga nima degan bo‘lardingiz?
- Albatta, futbolni muxlislarsiz tasavvur qilish qiyin. Shunday ekan, biz o‘z ishqibozlarimizni qadrlaymiz, hurmat qilamiz. Hozir ularni salbiy natijalarimiz bilan biroz ranjitib qo‘ymoqdamiz. Qolaversa, muxlislarimizga biroz noqulayliklar keltirib chiqaryapmiz, sababi, jamoaning uy uchrashuvlari o‘tkaziladigan markaziy stadionda ta’mirlash ishlari olib borilayotganligi sababli, ayrim uy uchrashuvlarini Muborakdagi Bahrom Vafoyev nomidagi arenada o‘tkazishga majburmiz. Buni «Buxoro» uchun uy uchrashuvlari deb bo‘lmaydi, neytral maydonda o‘ynaganimiz sababli, o‘zimizni safarda o‘ynayotgandek his qilamiz. Mavjud noqulayliklar va salbiy natijalar uchun muxlislardan uzr so‘rayman. Umid qilamizki, yaqin vaqtlar ichida vaziyatni ijobiy tomonga o‘zgartiramiz. Ishqibozlarimizga boshqa shaharda o‘tadigan o‘yinlarga borib-kelishlari uchun imkon darajasida sharoit yaratib beramiz. Albatta, biz muxlislarning qo‘llab-quvvatlashlariga muhtojmiz. Chunki, ko‘rib turganingizdek, qur’a bizga ketma-ket safar o‘yinlari va kuchli raqiblarni ro‘para qilmoqda. Ushbu uchrashuvlarda maksimal natijalarga erishishga harakat qilamiz va muxlislarimizni xushnud etamiz, degan umiddaman.
