Ushbu ruknimizdagi eng so‘nggi yangiliklar bilan tanishtirishda davom etamiz.

“Real Madrid” Martinelli bilan qiziqmoqda

Londonning “Arsenal” jamoasi hujumchisi Gabriyel Martinelli “Real Madrid” jamoasi nishonida turibdi.

“Marca” nashri bergan xabarlarga qaraganda, “qaymoqranglilar” yozda jamoani tark etishi kutilayotgan Luka Yovichning o‘rnini Zayniddin Zidan braziliyalik futbolchi bilan to‘ldirishni istamoqda.

Eslatib o‘tamiz, Madrid super klubi yozda shuningdek Erling Xoland va Killian Mbappe uchun harakat qilib ko‘radi.

“Barselona” Dembelening narxini e’lon qildi

Kataloniyaning “Barselona” jamoasi Usman Dembeleni sotishga qaror qildi. Bu haqida “TheSun” nashri ma’lum qilmoqda.

Avvalroq hujumchi bilan Angliyaning “Liverpul” jamoasi qiziqayotgani haqida xabar bergan edik.

Manbaning ma’lum qilishicha, “Liverpul” jamoasiga “Barselona” Usmanni 80 million yevroga sotishga tayyor ekanligini rasman e’lon qilgan.

Hozircha transfer haqida boshqa ma’lumotlar yo‘q, biroq Usman Dembelening yozda Katoliniyani tark etishi tobora oydinlashib bormoqda.

Pedro Italiya klubi nishonida

Angliyaning “Chelsi” jamoasi vingeri Pedro Italiyaning “Lasio” jamoasi radariga tushib qoldi. Bu haqida taniqli “LeGazzetadellaSport” nashri ma’lum qilmoqda.

Yozda erkin agentga aylanishi kutilayotgan ispaniyalik futbolchi uchun Rim klubi 3 yillik shartnoma taklif qilmoqchi. Manba bergan xabarga ko‘ra, Pedro uchun Rim klubi yiliga 3 million yevro maosh berishga tayyor ekanligini ma’lum qildi.

Pedro va uning agenti Italiya klubiga o‘tish borasidagi muzokaralarni boshlab yuborishgan.

Azmunning narxi ma’lum bo‘ldi

Rossiyaning “Zenit” jamoasi eronlik hujumchisining narxini e’lon qildi.

“Todofichajes”ning ma’lum qilishicha, “Zenit” Sardor Azmun borasida “Napoli” tomonidan tushgan taklifni ko‘rib chiqqan va o‘z hujumchisini 25 million yevro evaziga qo‘yib yuborishga tayyor ekanligini rasman ma’lum qilgan.

Eslatib o‘tamiz, avvalroq Serdar Azmun bilan Rimning “Lasio” klubi qiziqib qolgan edi.