Koronavirus pandemiyasi sababli yuzaga kelgan karantin tufayli yurtimizda barcha futbol musobaqalari to‘xtatilganidan xabaringiz bor. Superliga klublari rejalashtirilmagan tanaffusga chiqdi, qolaversa, futbolchilar jamoaviy mashg‘ulotlardan ham chetda qolishdi. Xususan, «Bunyodkor» a’zolari ham shu kunlarda ta’tilda bo‘lib turibdi. Biz bosh murabbiy Vadim Abramovning fikrlari bilan qiziqdik.

"Hozir qachon mashg‘ulotlarga qaytishimizni ayta olmayman. Bu vaziyatga bog‘liq. Biz hukumatimiz tomonidan chiqarilgan qarorlarni hurmat qilgan holda birinchilardan mashg‘ulotlarni to‘xtatganmiz. Bilishimcha, barcha jamoalar shunday yo‘l tutgan.

Futbolchilarga uy sharoitida jismoniy holatni bir maromda ushlab turishlari uchun mashg‘ulotlarni belgilab berganmiz. Buni nazorat ham qilyapmiz. Kuni kecha ham yigitlar bilan qo‘ng‘iroqlashib, buni yana bir bor eslatib o‘tdik. Sababi, tez orada yurtimizda chempionatni davom ettirish uchun ruxsat tegadigan bo‘lsa, o‘yinchilar qiynalib qolmasligi uchun ularning jismoniy holati talab darajasida bo‘lishi kerak. Bizga yetib kelgan ma’lumotlarga ko‘ra, aprel oyining uchinchi o‘n kunligidan boshlab mashg‘ulotlarga qaytishimiz mumkin bo‘lar ekan.

Ushbu kasallik bo‘yicha mutaxassis emasman. Bilganim shuki, barchamiz bir musht bo‘lib, shifokorlarning ko‘rsatmalari asosida donolik bilan yondoshadigan bo‘lsak, mazkur kasallikni yenga olamiz. Mutaxassislarning ta’kidlashicha, kunlar isishi bilan virusning rivojlanishi ham pasayar ekan. Umid qilamanki, bu uzoqqa cho‘zilmaydi", — dedi Abramov.