Ayni kunlarda deyarli butun dunyoni koronavirus pandemiyasi qamrab oldi. Shu jumladan jonajon vatanimizda ham ushbu virusga qarshi jiddiy kurash avj olmoqda. Barcha hududlarda karantin e’lon qilingan, odamlar o‘z uylaridan chiqmaslikka harakat qilishmoqda. Bunday pallada kam ta’minlangan hamda nogironligi bor oila a’zolariga bir muncha qiyin bo‘lishi barchamizga ayon. Biroq o‘zbek xalqi qo‘shnisi yoki hamshaharini qiyin ahvolda qoldirmaydi. Hozir barcha korxona va tashkilotlar, tadbirkorlar qiynalgan oilalarga saxovat qo‘lini uzatmoqdalar.

“Qo‘qon-1912” futbol klubi ham  bunday vaziyatda qarab turmaydi. Klub xodimlari bugun jamoaning ashaddiy muxlislari orasida kam ta’minlangan, yordamga muhtoj insonlarni topib ularga muruvvat ko‘rsatishdi. Shuningdek, jamoa tomonidan Qo‘qon shahrining “Muqimiy” mavzesida istiqomat qiladigan va 6-sonli oilaviy poliklinikasida ro‘yxatda turadigan 10 nafar nogironligi bor insonlarga ham  moddiy yordam ko‘rsatildi.

Poliklinika xodimlari esa bepul tibbiy niqoblar berish bilan bu ishga o‘zlarining xissalarini qo‘shishdi. Qo‘qondagi “Markaziy” stadionida mehnat qiladigan farroshlaru, qorovullar, xullas kimki yordamga muhtoj bo‘lsa e’tibordan chetda qolmadi. “Qo‘qon-1912” jamoasi bugungi o‘zbek xalqiga xos saxovatpeshalik ishlari uchun 10 000 000 so‘m mablag‘ ajratdi. Jamoamiz rahbariyati  yurtdoshlarimizga , barcha muxlislarimizga sog‘lik va oilalariga xotirjamlik tilaydi.