Айни кунларда деярли бутун дунёни коронавирус пандемияси қамраб олди. Шу жумладан жонажон ватанимизда ҳам ушбу вирусга қарши жиддий кураш авж олмоқда. Барча ҳудудларда карантин эълон қилинган, одамлар ўз уйларидан чиқмасликка ҳаракат қилишмоқда. Бундай паллада кам таъминланган ҳамда ногиронлиги бор оила аъзоларига бир мунча қийин бўлиши барчамизга аён. Бироқ ўзбек халқи қўшниси ёки ҳамшаҳарини қийин аҳволда қолдирмайди. Ҳозир барча корхона ва ташкилотлар, тадбиркорлар қийналган оилаларга саховат қўлини узатмоқдалар.

“Қўқон-1912” футбол клуби ҳам  бундай вазиятда қараб турмайди. Клуб ходимлари бугун жамоанинг ашаддий мухлислари орасида кам таъминланган, ёрдамга муҳтож инсонларни топиб уларга мурувват кўрсатишди. Шунингдек, жамоа томонидан Қўқон шаҳрининг “Муқимий” мавзесида истиқомат қиладиган ва 6-сонли оилавий поликлиникасида рўйхатда турадиган 10 нафар ногиронлиги бор инсонларга ҳам  моддий ёрдам кўрсатилди.

Поликлиника ходимлари эса бепул тиббий ниқоблар бериш билан бу ишга ўзларининг хиссаларини қўшишди. Қўқондаги “Марказий” стадионида меҳнат қиладиган фаррошлару, қоровуллар, хуллас кимки ёрдамга муҳтож бўлса эътибордан четда қолмади. “Қўқон-1912” жамоаси бугунги ўзбек халқига хос саховатпешалик ишлари учун 10 000 000 сўм маблағ ажратди. Жамоамиз раҳбарияти  юртдошларимизга , барча мухлисларимизга соғлик ва оилаларига хотиржамлик тилайди.